1955թ. սեպտեմբերի 30-ին Վազգեն եպիսկոպոսը ընտրվել Ամենայն հայոց կաթողիկոս


30-09-1955   | Հայաստան  |  Իրադարձություններ

1955թ. սեպտեմբերի 30-ին Մայր Աթոռում գումարված Ազգային եկեղեցական պատգամավորական համագումարը քվեների մեծամասնությամբ Վազգեն եպիսկոպոսին ընտրել է Ամենայն հայոց կաթողիկոս

Վազգեն Ա (ավազանի անունը` Լևոն-Կարապետ) Պալճյանը նախնական կրթությունն ստացել է Օդեսայի [Առաջին աշխարհամարտի (1914–18 թթ.) տարիներին այնտեղ էր հաստատվել Պալճյանների ընտանիքը] հայկական նախակրթարանում: Ռումինիայում վերահաստատվելուց հետո սովորել է Բուխարեստի Միսաքյան-Քեսիմյան ազգային, 1924–26 թթ-ին՝ Բուխարեստի առևտրական բարձրագույն վարժարանում: 1936 թ-ին ավարտել է Բուխարեստի պետական համալսարանի գրականության և փիլիսոփայության ֆակուլտետը, 1937 թ-ին՝ գործնական մանկավարժության բաժինը: 1930-ական թվականներից ռումինահայ գաղութի խնդիրներն արծարծել է «Մարտկոց» թերթում (1933 թ., Փարիզ), ապա՝ Բուխարեստում իր հիմնած «Հերկ» ամսագրի 12 համարներում (1937 թ-ի հունիսից 1938 թ-ի մայիս): 1929–43 թթ-ին դասավանդել է Բուխարեստի հայկական դպրոցներում, եղել հայ ռազմագերիներին օգնող կոմիտեի (1942–44 թթ.) կազմում: 1943 թ-ի սեպտեմբերին ռումինահայ թեմական խորհրդի որոշմամբ մեկնել է Աթենք, որտեղ Սբ Կարապետ եկեղեցում ձեռնադրվել է կուսակրոն քահանա: Նույն թվականի նոյեմբերին ընտրվել է Ռումինիայի հայոց թեմի առաջնորդական տեղապահ, ապա՝ թեմի առաջնորդ (1947–55 թթ.): 1948 թ-ի մայիսի 23-ին Սբ Էջմիածնի Մայր տաճարում Ամենայն հայոց կաթողիկոս Գևորգ Զ Չորեքչյանը նրան օծել է ծայրագույն վարդապետ, 1951 թ-ի մայիսին՝ եպիսկոպոս: 1954 թ-ի դեկտեմբերի 31-ին ստանձնել է նաև Բուլղարիայի հայոց թեմի առաջնորդի պարտականությունները: 1955 թ   ընտրվել է Ամենայն հայոց կաթողիկոս: Վազգեն Ա-ն ընտրվել է ՀՀ ԳԱԱ պատվավոր անդամ (1991թ.), ՀՀ-ում առաջինն է արժանացել Ազգային հերոսի կոչմանը (1994թ.): Նրա անունով կոչվել են Սևանի հոգևոր դպրանոցը և դպրոց Վանաձորում, հուշարձաններ են կանգնեցվել Վազգենյան հոգևոր դպրանոցի բակում (2008թ.) և Մայր աթոռ Աբ Էջմիածնում (2010թ., քանդակագործ` Ֆրիդ Սողոյան):

 
Վեհափառ հայրապետը վախճանվել է 1994թ. օգոստոսի 18-ին:


Լուրեր Հայաստանից եւ Սփյուռքից