«Սասնա ծռեր» էպոսին նվիրված փառատոնի եզրափակիչ միջոցառումը կանցկացվի Ուջան գյուղում
10-10-2015 12:00:00 | Աֆղանստան | Մշակույթ
ՀՀ մշակույթի նախարարության աջակցությամբ և «Սասնա տուն» հասարակության զարգացմանն աջակցման կենտրոն» հասարակական կազմակերպության նախաձեռնությամբ իրականացվող «Սասնա ծռեր» էպոսին նվիրված փառատոնը մեկնարկել է այս տարվա ապրիլից:
Փառատոնի շրջանակում ՀՀ Արագածոտնի մարզի Աշտարակ քաղաքում գտնվող Պերճ Պռոշյանի տուն-թանգարանում կայացել է «Սասնա ծռեր» էպոսը և հայ ժողովրդի ազգային ազատագրական շարժումը» խորագրով գիտաժողով, անցկացվել են էպոսասացության մրցույթներ Հայաստանի բոլոր մարզերում: Փառատոնի եզրափակիչ փուլի էպոսասացության մրցույթը կայացել է Հովհաննես Շարամբեյանի անվան ժողովրդական ստեղծագործության կենտրոնում, իսկ շարադրությունների օլիմպիադան՝ ՀՀ Արմավիրի մարզի Մեծամորի ավագ դպրոցում:
Ս. թ. հոկտեմբերի 10-ին, ժամը 12:00-ին, ՀՀ Արագածոտնի մարզի Ուջան գյուղում՝ փառատոնի հաղթողները ելույթ կունենան եզրափակիչ միջոցառմանը. կմասնակցեն ազգային երգի-պարի խմբեր և անհատ կատարողներ:
Ավանդական դարձած այս փառատոնը նշանակալից և կարևոր մշակութային իրադարձություն է, որի իրականացումը ոչ միայն նպաստում է մեր ազգային էպոսի պահպանմանը, կենսունակությանն ու հանրահռչակմանը, այլև շարունակական արժևորումն է հանդիսանում 2012 թվականին ՅՈՒՆԵՍԿՕ-ի մարդկության ոչ նյութական մշակութային ժառանգության ներկայացուցչական ցանկում Հայաստանի Հանրապետության ներկայացրած «Սասնա ծռեր կամ Սասունցի Դավիթ» էպոսի կատարողական դրսևորումները» հայտի ընդունման:
ՀԱՅԵՐԵՆ
Русский
English
Դաս. հայերեն
French