«Այբ»-ում տեղի կունենա Պատանի քիմիկոսների համահայկական վեցերորդ մրցաշարը
30-04-2016 09:00:00 | Հայաստան | Իրադարձություն
Ապրիլի 30-ին «Այբ» դպրոցում տեղի կունենա Պատանի քիմիկոսների համահայկական վեցերորդ մրցաշարը, որին կմասնակցի կիսաեզրափակիչ փուլ անցած 9 թիմ Արարատից, Գյումրուց, Մասիսից, Վանաձորից, Վաղարշապատից և Երևանից։
Մրցաշարի նպատակն է` ներգրավել աշակերտներին գործնական աշխատանքների մեջ, նպաստել նրանց ստեղծագործական կարողությունների և գիտական քննարկումներ վարելու հմտությունների զարգացմանը, խթանել քիմիայի արտադասարանական աշխատանքները:
Պատանի քիմիկոսների համահայկական մրցաշարի համակարգող Նինա Հոբոսյանի խոսքով մրցաշարն իր տեսակի մեջ միակն է Հայաստանում․ «Մրցույթն աշակերտներին հնարավորություն է տալիս ամբողջ թիմով փնտրելու և գտնելու լուծումներ առաջադրանքների միջոցով տրվող այնպիսի հարցադրումների, որոնք այս պահին գուցե դեռ լուծում չունեն, ուսումնասիրելու համաշխարհային փորձը և առաջարկելու սեփական լուծումները»։
Կիսաեզրափակիչ անցած բոլոր ինը թիմերը կստանան մասնակցության հավաստագրեր և մրցանակներ, իսկ մրցանակային տեղերը զբաղեցրած թիմերը` նաև դիպլոմներ:
Նշում. այս տարի մրցաշարն ունեցել է ռեկորդային թվով մասնակից՝ 36 թիմ, 172 մասնակից աշակերտ և 51 մարզիչ ու ղեկավար:
Հայաստանում Պատանի քիմիկոսների համահայկական մրցաշարի բացառիկ կազմակերպիչ` «Այբ» կրթական հիմնադրամ:
Մրցույթը Հայաստանում անցկացվում է ՀՀ կրթության և գիտության նախարարության հովանու ներքո:
Պատանի քիմիկոսների համահայկական մրցաշարը (ՊՔՀՄ) փոխներգործուն (ինտերակտիվ) խաղի սկզբունքով անցկացվող թիմային մրցույթ է, որտեղ 9-12-րդ դասարանների աշակերտները լուծում են քիմիայի բարդ ու հետաքրքիր առաջադրանքներ և բանավիճում գիտական թեմաների շուրջ: ՊՔՀՄ-ի մարտերը դատում է ժյուրին, որի կազմում ներգրավված են ԵՊՀ-ի, ՀԱՊՀ-ի և ՀՊՄՀ-ի դասախոսներ, երիտասարդ գիտաշխատողներ, ուսուցիչներ, այլ մասնագետներ:
ՀԱՅԵՐԵՆ
Русский
English
Դաս. հայերեն
French