Համերգ՝ դուդուկահար Գևորգ Դաբաղյանի և գերմանացի երաժիշտ Սորեն Բիրքենի մասնակցությամբ
28-09-2016 15:00:00 | Հայաստան | Համերգ
Սեպտեմբերի 28-ին՝ ժամը 15:00-ին, Կենտրոնում ՀՀ վաստակավոր արտիստ, դուդուկահար Գևորգ Դաբաղյանը (դուդուկ) և ազգույթամբ գերմանացի երաժիշտ Սորեն Բիրքեն (շրթհարմոն) հանդես կգան համատեղ համերգով: Համերգի ընթացքում կհնչեն հայ և արտասահմանյան հեղինակների ստեղծագործություններից:
Գևորգ Դաբաղյանը դուդուկի միջոցով ներկայացնում է հայ միջնադարյան, գուսանական և հոգևոր երաժշտությունը Հայաստանում և ամբողջ աշխարհում: Նա որպես դուդուկահար մասնակցել է բազմաթիվ փառատոների, համերգների և մրցույթների՝ արժանանալով բարձր մրցանակների: Նրա կատարումները հնչել են արտասահմանյան մի շարք կինոնկարներում. Ատոմ Էգոյանի՝ «Արարատ», իտալացի ռեժիսորներ Տավիանի եղբայրների՝ «Արտույտների ագարակը» և այլն: 1988թ-ից դասավանդում է Երևանի Կոմիտասի անվան պետական կոնսերվատորիայում: 2004թ. արժանացել է Հայաստանի Հանրապետության վաստակավոր արտիստի կոչման:
Սորեն Բիրքեն 2006 թվականից դուդուկի դասեր է վերցրել հայազգի նշանավոր դուդուկահարներ Ջիվան Գասպարյանի և Գևորգ Դաբաղյանի դասարաններում:
Սորեն Բիրքեն շրթհարմոն նվագել սկսել է ինքնուրույն: Մասնագիտացել է որպես ռոք երաժիշտ: 2002 թվականից մինչ այսօր համագործակցում է Գերմանիայում հայտնի երաժիշտ և երգիչ Դիրք Միխաելիսի հետ:
Նա ևս մասնակցել է բազմաթիվ մրցույթների, փառատոների և համերգների՝ Գերմանիայում, Միացյալ Նահանգներում, Ավստրալիայում, Լեհաստանում, Հայաստանում: 2007 թվականից մինչ այսօր Բեռլինի երաժշտական հանձնաժողովի խորհրդի անդամ է: 2016 թվականից “CIB – Creativ Industries Berlin” ընկերության համահիմնադիրն է:
2016թ. սեպտեմբերի 22-24-ը, Հայաստանում մասնակցել է «Դուդուկի և հայկական ժողովրդական նվագարանների փառատոն»-ին: