Սեպտեմբերի 30-ից հոկտեմբերի 2-ը, 2016թ., ք. Ծաղկաձոր
ՀՀ էկոնոմիկայի նախարարության «Նորամուծության և ձեռներեցության ազգային կենտրոն» ՊՈԱԿ-ը, «Երիտասարդ նորարարների և գիտնականների ասոցիացիա» հասարակական կազմակերպությունը համատեղ կազմակերպում են «Նորարարությունների կառավարում» II միջազգային երիտասարդական գիտական դպրոց, որը կկայանա ք. Ծաղկաձորում սեպտեմբերի 30-ից մինչև հոկտեմբերի 2-ը:
Դպրոցի նպատակն է ինտերակտիվ դասընթացների միջոցով մասնակիցներին ծանոթացնել գիտաինովացիոն նախագծերի առևտրայնացման արդյունավետ մեխանիզմներին, գաղափարից մինչև շուկա հասնելու գործընթացին և դրա առանձնահատկություններին, ինչպես նաև տալ անհրաժեշտ գիտելիքներ և հմտություններ մտավոր սեփականության օբյեկտների պահպանության և կառավարման բնագավառներում:
Դպրոցին մասնակցում են Հայաստանից, Լեռնային Ղարաբաղից, Ուկրաինայից, Խորվաթիայից, Բելառուսից, Վրաստանից, Իրանից և այլ երկրներից ժամանած 20-35 տարեկան երիտասարդ գիտնականներ, ուսանողներ, ասպիրանտներ, գիտաշխատողներ և նորարարներ:
Դպրոցի շրջանակներում նախատեսվում են սեմինարներ, դասախոսություններ, վարպետության դասեր ինովացիոն մենեջմենթի և նախագծերի կառավարման ոլորտի առաջատար հայ մասնագետների կողմից;
Դասախոսությամբ և վարպետության դասով հանդես կգա Commercialization Reactor-ի հիմնադիր, մի շարք ստարտափերի ստեղծող և ֆինանսավորող, գործարար և գիտական շրջանակներում որպես «բիզնես հրեշտակ» ճանաչված Նիկոլայ Ադամովիչը` հրավիրված Լատվիայի Հանրապետությունից:
Դպրոցի բացման արարողությունը տեղի կունենա սեպտեմբերի 30-ին ժ.10:00-ին Նորամուծության և ձեռներեցության ազգային կենտրոնում (ք. Երևան, Կոմիտասի 49/3, խորհրդակցությունների դահլիճ, 2-րդ հարկ, ՆՁԱԿ-ի կայքէջ` http://www.innovcentre.am/hy/, ֆեյսբուքյան էջ` https://www.facebook.com/InnovCentre):
Բացման խոսքով հանդես կգան Նորամուծության և ձեռներեցության ազգային կենտրոնի տնօրեն պարոն Գևորգ Վարդանյանը և Երևանում Ռուսաստանի գիտության և մշակույթի կենտրոնի տնօրեն Մարկ Կալինինը: Որից հետո տեղի կունենա «Երիտասարդ նորարարի դպրոց» երկարաժամկետ ծրագրի շրջանակներում կազմակերպված «Նորարարությունների կառավարում» կրթական առաջին ծրագրի մասնակիցներին հավաստագրերի հանձման հանդիսավոր արարողությունը: Միջոցառման ավարտից հետո աշխատանքային խմբերը կմեկնեն ք. Ծաղկաձոր դպրոցի ծրագրով նախատեսված աշխատանքներին մասնակցելու համար:
Ծրագիրը իրականացվում է ՀՀ Նախագահի կողմից հովանավորվող Երիտասարդ գիտնականների աջակցության ծրագրի, ՀՀ սպորտի և երիտասարդության հարցերի նախարարություն, ՀՀ ԳԱԱ երիտասարդ գիտնականների խորհրդի, Հայաստանի երիտասարդական հիմնադրամի և Երևանում Ռուսաստանի գիտության և մշակույթի կենտրոնի աջակցությամբ:
ՀԱՅԵՐԵՆ
Русский
English
Դաս. հայերեն
French
