Ռուսաստանի դաշնության և Հայաստանի հանրապետության Մշակույթի նախարարությունները Հայաստանի Ազգային ֆիլհարմոնիկ նվագախմբի հետ համատեղ «Հիշիր այս պահը» միջազգային փառատոնի շրջանակներում ներկայացնում են ՝ ազգությամբ հայ հանրաճանաչ երգահան Միքայել Թարիվերդիևի 85-ամյակին նվիրված երկու համերգ: Նախագծի իրականացմանն աջակցում են Ռոսկոնցերտ համերգա-հյուրախաղային միությունը և Միքայել Թարիվերդիև բարեգործական ֆոնդը:
Հոկտեմբերի 27-ին՝ ժամը 19-ին, Կոմիտասի անվան կամերային երաժշտության տանը կկայանա «Յո երթաս» խորագրով երգեհոնային երաժշտության համերգը: Ծրագրում կներկայացվեն Մուսորգսկու, Պրոկոֆևի, Ստրավինսկու, Թարիվերդիևի և Չայկովսկու ստեղծագործություններից: Որպես մենակատար կներկայանա Լադա Լաբզինան (Ռուսաստան), ում կողմից էլ կատարվել են ներկայացվելիք ստեղծագործությունների փոխադրումները երգեհոնի համար: Երեկոն կվարի կոմպոզիտորի կինը՝ Վերա Թարիվերդիևան, ով հանդիսանում է Միքայել Թարիվերդիևի բարեգործական ֆոնդի նախագահը, «Երաժշտության կենսագրությունը» (երգահանի կյանքի և ստեղծագործության մասին) գրքի հեղինակը, Միքայել Թարիվերդիևի անվան երգեհոնահարների մրցույթի գեղարվեստական տնօրենը:
Հոկտեմբերի 28-ին՝ ժամը 19-ին, Արամ Խաչատրյան համերգասրահում Հայաստանի Ազգային ֆիլհարմոնիկ նվագախումբը կներակայացնի Թարիվերդիևի 85-ամյակին նվիրված երկրորդ հոբելյանական համերգը: Ծրագրում՝ Կոնցերտ ձայնի և նվագախմբի համար, «Հիշիր այս պահը» վոկալ շարք, հատվածներ օպերաներից և կինոերաժշտությունից: Կմասնակցեն Մերիդիան վոկալ տրիոն (Նադեժդա Լուկաշևիչը, Նիկոլայ Սմետանինը , Ալեքսեյ Պոդշիվալովը), մենակատարներ Թեհմինե Զարյանը (սոպրանո), Ալեքսեյ Գորիբոլը (դաշնամուր), Դավիթ Բաբայանցը (բարիտոն) Արմեն Մեսրոպյանը (թավջութակ): Համերգը կրկին կվարի Վերա Թարիվերդիևան: Դիրիժոր՝ Ռուբեն Ասատրյան:
Հայաստանի Ազգային ֆիլհարմոնիկ նվագախումբը նոյեմբերի 2-ին և 4-ին՝ ժամը 19-ին, Արամ Խաչատրյան համերգասրահում Երևանյան 10-րդ միջազգային երաժշտական փառատոնի փակմանը կներկայացնի Ջուզեպե Վերդիի «Ռիգոլետո» օպերայի թատերականացված համերգային կատարումները: Փառատոնի հանդիսավոր փակումը կկայանա նոյեմբերի 2-ին: Կմասնակցեն հայտնի մեներգիչներ և Արական երգչախումբը: Հատուկ հյուր՝ Ջանպիերո Ռուջերի, բարիտոն (Իտալիա): Թատերական դրվագների բեմադրիչն է Սուքիաս Թորոսյանը: Դիրիժոր՝ Էդուարդ Թոփչյան:
Ազգությամբ հայ հռչակավոր երգահան, Ռուսաստանի ժողովրդական արտիստ, ֆիլմերի երաժշտության հեղինակ Միքայել Թարիվերդիևը (Թարիվերդյանը) ծնվել է 1931թ-ին Թբիլիսիում։ Սովորել է Թբիլիսիի երաժշտական տասնամյա դպրոցում, ապա՝ ուսումնարանում, որոշ ժամանակ՝ Երևանի կոնսերվատորիայում՝ զուգահեռ ուսանելով նաև հայերեն: 1957թ-ին ավարտել է Մոսկվայի Գնեսինների անվան երաժշտական-մանկավարժական ինստիտուտի (այժմ՝ Ռուսաստանի երաժշտական ակադեմիա) ստեղծագործական բաժինը՝ կոմպոզիտոր Արամ Խաչատրյանի ղեկավարությամբ։
Միքայել Թարիվերդիևը առավել հայտնի է ֆիլմերի համար գրված երաժշտությամբ։ Նա կինոյում ստեղծագործել է 1958թ-ից. հեղինակ է շուրջ 130 ֆիլմի երաժշտության, որոնց բնորոշ է ինքնատիպ մեղեդայնությունը: Առավել հիշարժան են՝ «Եղջերու Արքան» (1970թ.), «Գարնան տասնյոթ ակնթարթ» (1973թ.), «Տասնհինգերորդ գարունը» (1973թ.), «Ճակատագրի հեգնանքը» կամ «Բաղնիքդ անուշ» (1976թ.), «Հե՛յ, ո՞վ կա այդտեղ» (1979 թ., Հայֆիլմ) և այլ ֆիլմերի համար գրված երաժշտությունները։ Գրել է երաժշտություն նաև թատերական ներկայացումների և ռադիոբեմադրությունների համար։ Ստեղծագործել է երաժշտության գրեթե բոլոր ժանրերում։ Գրել է «Ո՞վ ես», «Կոմս Կալիոստրո», «Սպասում» օպերաները, «Ստվեր», «Երջանկության պոեմ», «Աղջիկը և մահը», «Աղջիկը գնդի վրա» բալետները, «Չեռնոբիլ» երգեհոնային սիմֆոնիան, կոնցերտներ ձայնի և նվագախմբի, ջութակի և նվագախմբի, երգեհոնի համար, դաշնամուրային պիեսների՝ 24, ռոմանսների՝ 15 (այդ թվում՝ «Տխուր երգեր»՝ Ավետիք Իսահակյանի խոսքերով) շարքեր, երգեր՝ ճապոնացի միջնադարյան բանաստեղծների, նաև Վիլյամ Շեքսպիրի, Բելա Ախմադուլինայի, Մարինա Ցվետաևայի, Սերգեյ Եսենինի, Վլադիմիր Մայակովսկու և ուրիշների խոսքերով։
Թարիվերդիևը 3 անգամ արժանացել է ՌԴ Նիկա կինոմրցանակին, Ամերիկյան երաժշտական ակադեմիայի մրցանակին։ 1997թ-ին հրատարակվել է նրա «Ես պարզապես ապրում եմ» գիրքը։ 1999թ-ից՝ 2 տարին մեկ, ՌԴ Կալինինգրադ քաղաքում անցկացվում է երգեհոնահարների՝ Թարիվերդիևի անվան միջազգային մրցույթը։