«Անի Պլազա» հյուրանոցի «Անի» սրահում կկայանա Զբոսաշրջության համաշխարհային օրվան նվիրված հանդիսավոր միջոցառում եւ զբոսաշրջության բնագավառում ավանդ ներդրած անձանց պարգեւատրման արարողություն

27-09-2010 18:00   |   |  
Սեպտեմբերի 27-ին`ժամը 18:00-ին, «Անի Պլազա» հյուրանոցի «Անի» սրահում կկայանա Զբոսաշրջության համաշխարհային օրվան նվիրված հանդիսավոր միջոցառում եւ զբոսաշրջության բնագավառում ավանդ ներդրած անձանց պարգեւատրման արարողություն:

Միջոցառման ընթացքում ՀՀ վարչապետ Տիգրան Սարգսյանը եւ ՀՀ էկոնոմիկայի նախարար Ներսես Երիցյանը ոլորտի մի շարք ներկայացուցիչների կհանձնեն շնորհակալագրեր: Ներսես Երիցյանը ՀՀ էկոնոմիկայի նախարարության ոսկե մեդալով կպարգեւատրի զբոսաշրջության բնագավառում ներդրած ավանդի համար:

Հանդիսությանը կմասնակցեն նախարարներ, պատգամավորներ, զբոսաշրջային արդյունաբերության ներկայացուցիչներ (զբոսաշրջային օպերատորներ, հյուրանոցներ, ավիաընկերություններ, զբոսավարներ, ուսումնական հաստատություններ, թանգարաններ, ռեստորաններ, բարմեններ), պետական եւ մասնավոր, գիտական եւ ուսումնական հաստատությունների, միջազգային կազմակերպությունների ներկայացուցիչներ:

Զբոսաշրջության համաշխարհային օրը նշվում է 1979 թվականից սկսած յուրաքանչյուր տարի սեպտեմբերի 27-ին: Զբոսաշրջության համաշխարհային օրվա հիմնական նպատակն է բարձրացնել համաշխարհային հանրության իրազեկվածությունը զբոսաշրջության եւ դրա սոցիալական, մշակութային, քաղաքական եւ տնտեսական արժեքների կարեւորության վերաբերյալ:

Լուրեր Հայաստանից եւ Սփյուռքից