ԷՍՏՈՆԻԱՅԻ ԵՎ ՀԱՅԱՍՏԱՆԻ ՖՈՒՏԲՈԼԱՅԻՆ ՀԱՎԱՔԱԿԱՆՆԵՐԸ ԿԱՆՑԿԱՑՆԵՆ
ԸՆԿԵՐԱԿԱՆ ՀԱՆԴԻՊՈՒՄ
05-11-1998 18:00:00 | Հայաստան | Սպորտ
ԵՐԵՎԱՆ, 5 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 21-ին ֆուտբոլի
Հայաստանի ազգային հավաքականը կհյուրընկալի Էստոնիայի հավաքականին:
Էստոնացիների ցանկությամբ, հաջորդ օրը Երեւանում կմրցեն նաեւ այդ
երկրի չեմպիոնը` «Ֆլորան» եւ Հայաստանի ընթացիկ առաջնության հաղթող
«Ցեմենտը»: Հայաստանի հավաքականի գլխավոր մարզիչ Սուրեն Բարսեղյանը
մտադիր է մրցաշրջանի վերջին խաղում փորձարկել հավաքականի
նորեկներին` ռուսաստանյան առաջնության բարձրագույն խմբի Սոչիի
«Ժեմչուժինայի» խաղացողներ Մանուկ Կակոսյանին եւ Արտաշես
Քալայջյանին, ինչպես նաեւ «Ուրալանի» ֆուտբոլիստ Տիգրան
Պետրոսյանցին:
Հավաքականում իրենց ուժերը կփորձեն նաեւ հանրապետության
վերջին առաջնությունում իրենց լավագույն կողմերով դրսեւորած մի
խումբ ֆուտբոլիստներ, այդ թվում լավագույն ռմբարկու «Դվինի»
հարձակվող Արա Հակոբյանը: Հայրենի հավաքականում հանդես գալու
խնդրանքով Բարսեղյանին է դիմել ամերիկահայ ֆուտբոլիստ Վրեժ
Շահբանդարյանը, որը խաղում է «Սան Դիեգոյում»: Իսկ Իսրայելում
փորձաշրջան են անցկացնում մեր հավաքականի երկու ներկայացուցիչներ
Արթուր Պետրոսյանը եւ Համլետ Մխիթարյանը, որոնց հետ հավանական է
պայմանագիր կնքեն համապատասխանաբար Պետահ Տիկվայի եւ Հերցլիայի
նույնանուն «Մակկաբի» ակումբները: