Կմեկնարկի էլեկտրոնային կառավարման զարգացման ԵՄ նոր ծրագիրը
30-11-2012 18:04:20 | Հայաստան | Գիտություն եւ տեխնոլոգիաներ
Դեկտեմբերի 3-ին Հայաստանում Եվրոպական Միության ֆինանսավորմամբ կմեկնարկի «Հայաստան – էլեկտրոնային կառավարման համակարգային զարգացում» ծրագիրը: Այս նոր նախաձեռնությունը նպատակ ունի ներդնել էլեկտրոնային գործարքների իրականացման ծրագրեր, օժանդակել քաղաքացիական կացության ռեգիստրի թվայնացմանը եւ Հայաստանի քաղաքացիներին տրամադրել կառավարության հետ հաղորդակցվելու նոր ուղի:
Ծրագրի շրջանակներում նաեւ կիրականացվի ազգային արխիվների թվայնացում, կստեղծվի վիճակագրական հաշվետվությունների էլեկտրոնային համակարգ, եւ կառավարության հետ կապ հաստատելու համար նոր էլեկտրոնային փոստի համակարգ: Ընդհանուր առմամբ, ծրագիրը նպատակ ունի նպաստել Հայաստանում հանրային ոլորտի բարեփոխումներին եւ ներդնել էլեկտրոնային կառավարման նոր համակարգեր՝ դրական ազդեցություն թողնելով ժողովրդավական զարգացման, ինչպես նաեւ թափանցիկ գործունեության ապահովման ու հակակոռուպցիոն միջոցառումների վրա:
«Հայաստան – էլեկտրոնային կառավարման համակարգային զարգացում» ծրագիրը ֆինանսավորվում է Եվրոպական Միության կողմից: Ծրագրի ֆինանսավորման չափը կազմում է 1.3 միլիոն եվրո, իսկ տեւողությունն է՝ 2 տարի:
Ծրագրի շնորհանդեսը տեղի կունենա Արմենիա Մարիոթ հյուրանոցում, ժամը 11:00-ին: Ողջույնի խոսքով հանդես կգան պարոն Տրայան Հրիստեան, Հայաստանում Եվրահանձնաժողովի պատվիրակության ղեկավար, եւ պարոն Պրն. Դավիթ Սարգսյանը, Հայաստանի Հանրապետության կառավարության աշխատակազմի ղեկավար: Ծրագրի, ինչպես նաեւ Հայաստանում էլեկտրոնային կառավարման համակարգի վերաբերյալ զեկույցով հանդես կգա պրն. Իվառ Թալլոն, ծրագրի ղեկավար:
ՀԱՅԵՐԵՆ
Русский
English
Դաս. հայերեն
French
