ՎԵՆԵԶՈՒԵԼԱՅԻ նախագահ՝ Հուկօ Չավէզ, Մարտ 5ին, Քարաքասի մէջ մահացաւ, 58 տարեկանին, յետ երկարատեւ հիւանդութեան: Մարտ 6ին, տասնեակ հազարաւոր համակիրներ անոր դագաղին ընկերացան, հիւանդանոցէն՝ երկրին զին-
ւորական գլխաւոր վարժարանին ճամբուն վրայ: Աճիւնը հոն կը մնար երեք օր, մինչ պատրաստութիւններ կը տեսնուէին մեծ շուքով կատարելու համար նախագահին յուղարկաւորութիւնը: Ան աւելի քան երկու տարի պայքարած էր քաղցկեղի դէմ: Ջատագովն էր Լատին Ամերիկայի երկիրներուն միջեւ քաղաքական եւ տնտեսական համարկումին, մանաւանդ խիստ քննադատող մը՝ կայսերապաշտութեան, համաշխարհայնացման ու Միացեալ Նահանգներու դրամատիրական կարգերուն: Վենեզուելայի կառավարութիւնը եօթնօրեայ սուգ հռչակած էր եւ ըստ սահմանադրութեան՝ նախագահական ընտրութիւններ պէտք է կատարուին ամիս մը ետք: Օպամա յայտարարած է, որ Չաւէզի մահէն ետք, Ուաշինկթըն «շահագրգռուած է Վենեզուելայի հետ կառուցողական յարաբերութիւններով»: Նախագահ Ս. Սարգսեան ցաւակցական հեռագիր մը յղած է Վենեզուելայի փոխնախագահ՝ Նիքոլաս Մատուրօ Մորոսին՝ Չավէզի մահուան կապակցութեամբ:
ՍՈՒՐԻՈՅ մէջ, ՄԱԿ-ի խաղաղապահ առաքելութեան 20 դէտեր առեւանգուած են Մարտ 6ին, Կոլանի մէջ: Այս առեւանգումէն ետք, ընդդիմութեան մօտ աղբիւրներ հաղորդած են, թէ ՄԱԿ-ի խաղաղապահները առեւանգուած են, որովհետեւ անոնք կը նպաստէին շրջանը իշխանութեանց հակակշիռին վերադարձնելու փորձերուն: Չորեքշաբթի օր, Մարտ 6ին արաբ Արտաքին գործոց նախարարները որոշած են՝ Արաբական լիկային մէջ Սուրիոյ աթոռը այսուհետեւ տրամադրել սուրիական ընդդիմութեան կազմած Ազգային համաձայնական մարմինին: Անոնք նաեւ անդամ պետութիւններուն՝ ընդդիմութեան զէնքեր տրամադրելու արտօնութիւն տուած են: Միւս կողմէ, Իսրայէլ ալ ՄԱԿ-ի Ապահովութեան խորհուրդին յղած է բողոքագիր մը, ըսելու համար թէ իր համբերութիւնը սպառելու վրայ է Սուրիայէն արձակուած ու Իսրայէլ ինկող հրթիռներուն հարցով: Իսկ Ուաշինկթըն ողջունած է Հալէպի նահանգապետական խորհուրդ ընտրելու սուրիական ընդդիմութեան քայլը: Ընդդիմութիւնը, անցեալ Կիրակի, Հալէպի նահանգին մէջ ընդդիմութեան վերահսկողութեան տակ գտնուող շրջաններու կառավարման համար 29 անդամներէ բաղկացած տեղական կառավարման մարմին մը ընտրած է: Ընտրութիւնը տեղի ունեցած է Թուրքիոյ մէջ:
ՅՈՒՆԱՍՏԱՆԻ վարչապետ Անթոնիս Սամարաս վերջերս Թուրքիա կատարած այցելութեան, թուրք իր պաշտօնակիցին՝ Էրտողանի հետ ունեցած հանդիպումի աւարտին յայտարարած է, թէ իր երկիրը կը զօրակցի Թուրքիոյ՝ Եւրոպական Միութեան անդամակցութեան, «որովհետեւ ատիկա կը նպաստէ կիպրական տագնապի լուծումին»: Սամարաս Թուրքիան նկատած է «լաւ դրացի մը»՝ դրուատելով անոր իրագործած բարեփոխումները: