Գ. Մակարյան. "Աշխատանքի միջավայրի պարտադրվող այսօրվա մոտեցումները պահանջում են աշխատողների համար առողջ ու անվտանգ պայմանների ստեղծում"
25-06-2013 18:33:38 | Հայաստան | Տնտեսություն
Հունիսի 25-ին տեղի ունեցավ Աշխատանքի պաշտպանության և առողջության ու անվտանգության պահպանման բնագավառում «ԳԵՐԱԶԱՆՑՈՒԹՅԱՆ ԿԵՆՏՐՈՆՆԵՐ» խորագրով լավագույն կազմակերպությունների մրցանակաշխության արարողությունը:
Մրցանակաշխությունը ս.թ. փետրվար ամսին հայտարարել է Հայաստանի գործատուների հանրապետական միությունը, որի արդյունքում հաղթող 4 կազմակերպությունները` «Էլբատ» ՓԲԸ, « Արմենիա» միջազգային օդանավակայանը, «Ֆիլիշին» ՍՊԸ-ն եւ «Գլաս Ուորլդ Քամփնի» ՓԲԸ-ն արժանացան եռակողմ սոցիալական գործընկերների՝ ՀՀ աշխատանքի և սոցիալական հարցերի նախարարություն, Հայաստանի գործատուների հանրապետական միության և Հայաստանի արհմիությունների կոնֆեդերացիայի, կողմից Հավաստագրերի, որպես լավագույն գերազանցության կենտրոններ:
ՀՀ Աշխատանքի եւ սոցիալական հարցերի առաջին տեղակալ Արա Պետրոսյանը շնորհակալություն հայտնեց Հայաստանի Գործատուների Հանրապետական Միությանը, որ նման հիանալի միջոցառում է կազմակերպել: «Ուրախ ենք, որ նման միջոցառումները ավանդույթի ուժ են ձեռք բերում»,- ասաց ՀՀ Աշխատանքի եւ սոցիալական հարցերի առաջին տեղակալը՝ միաժամանակ կարեւորելով այն փաստը, որ տարբեր գործատուներ իրենց աշխատանքային գործունեությունն ու գործարար միջավայրը համապատասխանեցնում են այսօրվա պահանջներին: Ա. Պետրոսյանը տեղեկացրեց, որ վերջին տարիներին ՀՀ Աշխատանքի եւ սոցիալական հարցերի նախարարությունը Աշխատանքի միջազգային կազմակերպության հետ իրականացնում է մի շարք հետաքրքիր ծրագրեր:
Հայաստանի Գործատուների Միության նախագահ Գագիկ Մակարյանն էլ նշեց, որ Հայաստանի Գործատուների Միությունը 3 տարի իրականացրել է մի շարք ծրագրեր, որոնք ուղղված են եղել գործարար միջավայրի զարգացմանը: «Նախորդ տարիներին եւս անցկացրել ենք նմանատիպ միջոցառումներ, բայց առաջին անգամ ենք իրականացնում մի միջոցառում, որը հռչակում է «Գերազանցության կենտրոններ», իսկ դա նշանակում է, որ ընտրված կազմակերպություններն իրենց գործունեությունը մոտեցրել են իդեալականին»,- ասաց Գ. Մակարյանը: Նա նշեց, որ աշխատանքի միջավայրի պարտադրվող այսօրվա մոտեցումները պահանջում են աշխատողների համար առողջ ու անվտանգ պայմանների ստեղծում:
Հայաստանի Գործատուների Հանրապետական Միությունը (ՀԳՀՄ) 2007թ-ից սկսած իրականացնում է աշխատանքներ կազմակերպություններում Աշխատանքի պաշտպանության եւ աշխատողների առողջության պահպանման (ԱՊ) բնագավառում, բարեփոխումների նպատակով: ՀԳՀՄ մասնավորապես լինելով ՀՀ կառավարության, Հայաստանի արհմիությունների կոնֆեդերացիայի սոցիալական գործընկերության կողմ` 2011-2012թ-ի ընթացքում իրականացրել է մրցանակաբաշխություններ՝ խրախուսելու համար այդ ոլորտում լավագույն կազմակերպությունները:
Մրցանակաբաշխության շրջանում կազմակերպություններում իրականացվել են ԱՊ համակարգի նախնական գնահատումներ ՀԳՀՄ փորձագիտական խմբի կողմից, որպես տեխնիկական աջակցություն կազմակերպություններում ուսումնասիրվել են նաեւ աշխատատեղերի վիճակը, առկա փաստաթղթերը անվտանգության նշանների առկայությունը:
ՀԳՀՄ փորձագետներն ու խորհրդատուները որոշակի ժամանակահատվածում աջակցել են մրցանակաբաշխությանը մասնակցող կազմակերպությունների առկա թերությունների վերացմանը, նպատակ ունենալով ԱՊ համակարգը հասցնել գերազանցության մակարդակի:
ՀԱՅԵՐԵՆ
Русский
English
Դաս. հայերեն
French
