Մայրաքաղաքում գովազդային հին վահանակներն փոխարինվում են նոր, արդի գովազդային կրիչներով
29-08-2013 18:40:04 | Հայաստան | Տնտեսություն
Մայրաքաղաքում շարունակվում են գովազդային վահանակները և պաստառները օրենսդրությանը համապատասխանեցնելու ուղղությամբ տարվող աշխատանքները: Երևանի քաղաքապետարանի աշխատակազմի արտաքին ձևավորման և գովազդի վարչության պետ Արազ Բաղդասարյանը նշել է, որ չափորոշիչներին չհամապատասխանող գովազդների ապամոնտաժմանը զուգահեռ՝ ավելի քան 1000 տնտեսվարողի անվճար տրամադրվել է մասնագիտական խորհրդատվություն, մատուցվել են դիզայներական ծառայություններ՝ դարձյալ անվճար:
Արդյունքում ապամոնտաժված գովազդների տեղում տեղադրվում են նոր պաստառներ ու վահանակներ, որոնք համապատասխանում են Երևանի քաղաքապետին կից քաղաքաշինական խորհրդի գեղարվեստի հանձնաժողովի կողմից հաստատված գովազդային վահանակների տեղադրման առանձնահատկությունների ու համաչափությունների նախագծին:
Մայրաքաղաքի փողոցներում տեղադրված գովազդային հին վահանակներն էլ փոխարինվում են նոր, արդի գովազդային կրիչներով: Տնտեսվարողների հետ ձեռք բերված պայմանավորվածության համաձայն՝ արդեն սեպտեմբերին կփոխարինվեն Սայաթ-Նովայի պողոտայի գովազդները:
Երևանի քաղաքապետարանի տեղեկատվության և հասարակայնության հետ կապերի վարչությունից հայտնում են որ արտաքին ձևավորման և գովազդի վարչության կողմից կատարվում են նաև հավելյալ գույքագրումներ` մայրաքաղաքում առկա և օրենսդրությանը չհամապատասխանող գովազդների ապամոնտաժման 2-րդ փուլով նախատեսված աշխատանքները սեպտեմբերից սկսելու համար: