Հստակեցվել են այն ուղղությունները, որոնց շրջանակում Երեւանը
կհամագործակցի ՉԺՀ քաղաքների հետ
21-01-2011 18:24:00 | Հայաստան | Հասարակություն
ԵՐԵՎԱՆ, 21 ՀՈՒՆՎԱՐԻ, ՆՈՅՅԱՆ ՏԱՊԱՆ: Երեւանի եւ Չինաստանի
քաղաքների միջեւ համագործակցության ընդլայնման եւ փոխշահավետ
ծրագրերի իրականացման խնդիրներ են քննարկվել Երեւանի քաղաքապետ
Կարեն Կարապետյանի եւ Հայաստանում Չինաստանի արտակարգ եւ լիազոր
դեսպան Թիան Չանչունի հունվարի 21-ի հանդիպմանը:
Ըստ Երեւանի քաղաքապետարանի Տեղեկատվության եւ
հասարակայնության հետ կապերի վարչության հաղորդագրության, կողմերը
հստակեցրել են բոլոր այն ուղղությունները, որոնց շրջանակում
քաղաքապետարանը պատրաստ է համագործակցել ՉԺՀ քաղաքների հետ:
Շնորհավորելով Կ.Կարապետյանին Երեւանի քաղաքապետի պաշտոնում
ընտրվելու կապակցությամբ, դեսպանն ասել է. «Համոզված եմ, որ Ձեր
պաշտոնավարման ընթացքում Երեւանը կունենա բուռն զարգացում եւ է'լ
ավելի կգեղեցկանա»: