ՊՈՒԷՆՈՍ ԱՅՐԷՍ («Արմենիա» թերթ).- Հինգշաբթի, Սեպտեմբեր 12ին, Արժանթինի Խորհրդարանին մէջ կազմուեցաւ Հայաստանի Հանրապետութեան եւ Արժանթինի Երեսփոխանական Տան միջեւ Բարեկամական Խումբը։ Երեսփոխան Քրիստինա Զիէպարթի (Ֆրենթէ փարա լա Վիքթորիա Կուսակցութիւն) նախագահութեամբ, Խումբին մաս կը կազմեն երեսփոխաններ Գարլոս Ռայմունտի (Նուէվօ Էնքուէնթրօ Կուսակցութիւն), Տիանա Գոնթի (Ֆրենթէ փարա լա Վիքթորիա Կուսակցութիւն), Օմար Պարչէթթա (Ընկերվարական Կուսակցութիւն), Ալֆրէտօ Աթանասոֆ (Ֆրենթէ Փերոնիսթա Կուսակցութիւն), Խուան Գարլոս Սապալսա (Ընկերվարական Կուսակցութիւն), Ռոտոլֆօ Ֆէրնանտէս (Ռատիքալ Կուսակցութիւն), Ռիքարտօ Խիլ Լավէտրա (Ռատիքալ Կուսակցութիւն), Մարիօ Մէթասա (Ֆրենթէ փարա լա Վիքթորիա Կուսակցութիւն), Գլաուտիօ Լոսանօ (Ունիտատ Փոփուլար Կուսակցութիւն), Օսքար Գուռիլէն (Ֆրենթէ փարա լա Վիքթորիա Կուսակցութիւն), Պէաթրիս Լոթթօ (Ֆրենթէ փարա լա Վիքթորիա Կուսակցութիւն) եւ Մոնիքա Գոնթրէրա (Ֆրենթէ փարա լա Վիքթորիա Կուսակցութիւն)։

Ներկայացման արարողութեան ներկայ գտնուեցան Արտաքին Յարաբերութեանց եւ Կրօնի Յանձնախումբի նախագահ՝ Կիժերմօ Գարմոնա, եւ Բարեկամական Խումբերու համադրող՝ Սանտրա Գապաժէրօ, ինչպէս նաեւ այլ երեսփոխաններ, կառավարական պաշտօնեաներ եւ Հ.Յ.Դ. Հարաւային Ամերիկայի Հայ Դատի Յանձնախումբի անդամներ։

Երեսփոխան Կիժերմօ Գարմոնա Արժանթինի մէջ հայ համայնքի կարեւորութիւնը շեշտեց, նշելով Հայոց Ցեղասպանութեան նկատմամբ երկրի յստակ դիրքորոշումը, որու նմոյշ մըն է Հայոց Ցեղասպանութեան ի յիշատակ Ապրիլ 24ը «Հանդուրժողականութեան եւ Ժողովուրդներու միջեւ Յարգանքի Օր» հռչակող Թիւ 26.199 օրէնքը։

 

 

Նկար.- Հայաստանի Հանրապետութեան Դեսպան՝ Վահանգն Մելիքեան, Հայաստանի Հանրապետութեան եւ Արժանթինի Երեսփոխանական Տան միջեւ Բարեկամական Խումբի անդամ երեսփոխաններով

 

 

 

 

 

Նոյյան տապան  -   Քաղաքական