27-03-2014 12:48:42 | Հայաստան | Գիտություն եւ տեխնոլոգիաներ
Այսօր Հայաստանի և Արցախի ավելի քան 44 200 աշակերտ կմասնակցի «Կենգուրու 2014» միջազգային մաթեմատիկական մրցույթին:
Արդեն 6-րդ տարին է, ինչ «Այբ» կրթական հիմնադրամը Հայաստանում կազմակերպում և անցկացնում է աշխարհի ամենասիրված դպրոցական մրցույթը՝ «Կենգուրուն»: Ի դեպ՝ աշակերտների մասնակցության այս տարվա ցուցանիշն ամենաբարձրն է նախորդ հինգ տարիների համեմատ։
Մասնակիցների լրացրած պատասխանի թերթիկները ստուգվելու են «Այբ» հիմնադրամում` հատուկ համակարգչային ծրագրի օգնությամբ: Ինչպես միշտ, յուրաքանչյուր դպրոց մայիսի առաջին կեսին ստանալու է ամփոփ հաշվետվություն իր աշակերտների արդյունքների մասին: Նույն ամսվա երկրորդ կեսին նախատեսվում են մրցանակաբաշխություններ Հայաստանի բոլոր մարզերում և Ստեփանակերտում:
Համաձայն «Kangaroo sans Frontieres» միջազգային ասոցիացիայի կանոնների` «Կենգուրուի» խնդիրներն ու ճիշտ պատասխանները հրապարակվում են մասնակից երկրների կայքերում՝ մրցույթից մեկ ամիս անց: Մեր երկրում դրանք կհրապարակվեն 2014 թ.ապրիլի 28-ին, մրցույթի www.kangaroo.am կայքէջում:
Մանրամասների համար այցելեք www.kangaroo.am կայքը:
Հայաստանում և Արցախում «Կենգուրու» մրցույթի բացառիկ կազմակերպիչն է «Այբ» կրթական հիմնադրամը:
Մրցույթն անցկացվում է Հայաստանում՝ ՀՀ կրթության և գիտության, Արցախում՝ ԼՂՀ կրթության և գիտության նախարարությունների հովանու ներքո: