04-03-2015 18:32:31 | Ֆրանսիա | Ի՞նչ է գրում մամուլը
2009 - «Նոր Յառաջ» ծնունդ առաւ գաղափարէ մը։ Հայախօս մամուլի անհետացումը Արեւմուտքի մէջ անխուսափելի չէ։ Ընդհակառակն, հայերէն լեզուի այժմէականացման գրաւը արդիական հնչողութիւն ունի որ կը պահանջէ տեւական ինքնահարցադրում։
2011 - HEBDO-ն՝ ֆրանսերէն յաւելուածը լոյս տեսաւ, 4 էջ։ Մինչ այդ բացարձակապէս հայերէն լեզուով արտայայտուելու խմբագրական ուղեգիծին մէջ պզտիկ յեղափոխութիւն մը։ Բայց իրականութեան մէջ անհրաժեշտ շրջադարձ մը՝ գոհացնելու համար թերթիս բաժանորդ ֆրանսախօս ընտանիքները։ Նորութիւն մը, որ իր ատենին գոհունակութեամբ ընկալուեցաւ յատկապէս տարեց բաժանորդներու կողմէ, որոնք ընտանեկան յարկէն ներս երիտասարդ սերունդի անդամներուն հետ հայկական անցուդարձերուն մասին զրուցելու, միտքեր փոխանակելու նոր ասպարէզ մը կը գտնէին եւ փոխադարձաբար երիտասարդներուն համար որոնք հայերէնին չեն տիրապետեր։
2015 - Թերթս աւելի քան երբեք իր գրաւը կը դնէ երկլեզւութեան վրայ։ Այս թիւէն սկսեալ իր 4 էջնոց շաբաթական ֆրանսերէն յաւելուածը կը վերածէ 12 էջի։ Խմբագրութիւնս կը փորձէ բազմացնել անցքերը։ Հաղորդակցիլ, տարածել մշակոյթը ամենալայն շրջանակներուն եւ հայկական աշխարհահայեացքը բաժնել ժամանակակից ընկերութեան հետ։ Ահաւասիկ նպատակը։
Ինչ կը վերաբերի շաբաթական ֆրանսերէն 12 էջերուն, այդ մեզի կը թուի ըլլալ ճիշդ համեմատութիւնը՝ համատեղելու համար բոլոր հանրութիւնները, սերունդները, ինչպէս նաեւ՝ բազմաբեւեռ աշխարհի եւ աշխարհաքաղաքական բարդ իրադարձութիւններու օրէ օր աւելի ճոխ տեղեկութիւնները հասցնելու միջոց։
Ի վերջոյ, տեղեկատւութեամբ յագեցած մեր շրջապատին մէջ, այս յաւելեալ քանի մը էջերը աւելորդ չեն, այլ կու գան լրացնելու բաց մը՝ ներկայացնելու այն ինչ, որ ուրիշ լրատու միջոցները չեն փոխանցեր, կը խուսափին կամ կ՚անտեսեն։ Բայց նաեւ հրամցնելու՝ վերլուծումներ, տարբեր դիտակէտ մը, ֆրանքեւհայկական, ինչու չէ նաեւ եւրոհայկական ընթերցում մը։
Վստահաբար այս 12 էջերը մեզ աւելի եւս կը մօտեցնեն Հայաստանին եւ Հայաստանը՝ մեզ։ Ցարդ, ֆրանսախօս ընթերցողը նուազ տեղեկացուած էր քան անգլիախօս, ռուսախօս եւ բնականաբար հայախօսը։ Կարիքը ունինք աւելի մեծ թիւով ֆրանսալեզու լրատու միջոցներու, լաւապէս ներկայացնելու համար ամբողջ հայկական իրադարձութիւնները՝ իրենց այլազան եւ բազմակողմանի երեսներով։
100ամեակին առիթով 2015ը զօրակոչի տարի է ֆրանսահայ համայնքին համար։ Պէտք է այդ մասին տեղեակ պահել, նաեւ գրաւոր հետք ձգել։ Եթէ մենք, «Նոր Յառաջ»ը եւ հայկական մամուլը չընէին այս գործը, ուրիշ որեւէ այլ լրատու միջոց պիտի չընէր մեր փոխարէն։ Յաւելեալ՝ որքան տեղեկատւութիւնը տարածուի, այնքան հայութեան յիշողութեան հաւաքական աշխատանքը կ՚արժեւորուի։ Ինչ կը վերաբերի Էրտողանի կամ երկրագունդի այլ գերտէրութիւններու ղեկավարներու խօսքերուն, անկասկած որ միջազգային լրատու միջոցները լայնօրէն պիտի անդրադառնան անոնց։ Մենք մեր կողմէ պիտի գիտնանք արժեւորել մեզ հետաքրքրողը։ Իսկ այնքան յուսացեալ հաւաքական վերանորոգութեան աշխատանքին առընչութեամբ պէտք է դադրինք զայն մեր շուրջը փնտռելէ, այլ՝ զայն որոնենք մեր մէջ։
«Նոր Յառաջ»ի շաբաթական թիւը այսուհետեւ լրատու միջոցներու խաղադաշտին մէջ պիտի գրաւէ իր իւրայատուկ տեղը՝ շաբաթաթերթինը, որ ցարդ թափուր կը մնար ֆրանսախօս հայկական մամուլի շրջանակին մէջ։ Մեր ընթերցողներու ընդունելութիւնը եւ հակազդեցութիւնը իրենց տիրական դերը պիտի ունենան՝ մեզի մեր այս նոր նախաձեռնութեան կամ «արկածախնդրութեան» մէջ առաջնորդելու համար։ Առայժմ այս 12 էջերը բաժանորդներուն պիտի հասնին ամէն Հինգշաբթի օր «Նոր Յառաջ»ին հետ, յաւելուածի ձեւով, առանց յաւելեալ վճարումի։ Յետագային կարելի պիտի ըլլայ ուրիշ տարազներ որդեգրել՝ ըստ ընթերցողներու պահանջներուն եւ պիւտճէական հրամայականներուն։
«Նոր Յառաջ»ի երկլեզւութեան անցումի ծրագիրը կը գանձատրուի «Կիւլպէնկեան» հիմնարկութեան կողմէ։