04-03-2015 18:34:32 | Ֆրանսիա | Ի՞նչ է գրում մամուլը
Երեքշաբթի Մարտ 3ին, երեկոյեան ժամը 18.30ին բացումը կատարուեցաւ Արմէն’Լիվրի գիրքերու 10րդ տօնավաճառին։ Այս տարուան պատուոյ հիւրերն են Ալֆորվիլի յաջորդական երեք քաղաքապետերը՝ Ժոզէֆ Ֆրանչեսքի (հանգուցեալ), Ռընէ Ռուքէ, եւ Լիւք Գարվունաս, որոնք աւելի քան յիսուն տարի վարած են Ալֆորվիլի քաղաքապետական պաշտօնը։
Ներկայ էին՝ Նորվան Արք. Զաքարեան, Պատուելի Ռընէ Լեւոնեան, ՀՀ դեսպանորդ՝ Վահագն Աթաբէկեան, Արցախի Հանրապետութեան ներկայացուցիչ՝ Յովհաննէս Գէորգեան, հայ համայնքի բազմաթիւ ներկայացուցիչներ եւ հրաւիրեալներ։ Բացման խօսքերը արտասանեցին՝ Տիկին Յասմիկ Գեւոնեան եւ Արշալոյս Սարգիսեան, որոնցմէ ետք բեմ հրաւիրուեցաւ պատմաբան Ծովինար Գեւոնեան, որ պատուոյ հիւրերուն գործունէութեան մասին արտայայտուեցաւ։ Խօսք առին նաեւ ՊՊ. Գարվունաս եւ Ռուքէ։ Այնուհետեւ, կարդացուեցաւ Անահիտ Տէր Մինասեանի յղած նամակը, որ անցեալ ինը տարիներուն ընթացքին հանդիսացած է Արմէն՚Լիվրի «կնքամայրը»։
Այս տարուան Գիրքերու տօնավաճառը Դեկտեմբեր ամիսէն տեղափոխուեցաւ Մարտ ամիս, յատուկ կերպով նշելու համար 100ամեակը Ցեղասպանութեան զոհերուն։ Ալֆորվիլի Pôle Culturel-ի հսկայ սրահը յատկացուած է շուրջ 6.000 գիրքերու, նաեւ ցուցահանդէսի մը՝ նկարիչ Ժան-Փիէր Սէֆէրեանի «Անապատ»ը փորագրութիւններուն։ Կը ցուցադրուին նաեւ 1915 Ապրիլ 24ի նահատակ գրող-մտաւորականներու լուսանկարներ, որոնք Հրանդ Տինք Հիմնարկին կողմէ տրամադրուած են Հայ Մշակոյթի տան։
Յիշենք, որ այս տարուան Տօնավաճառին առթիւ տեղի պիտի ունենան մշակութային կարգ մը ձեռնարկներ՝ ինչպէս Մարտ 4ին «Նայիրի» հնգեակին համերգը Աննա Մայիլեանի մասնակցութեամբ։ Շաբաթ Մարտ 7ին տեղի կ՚ունենայ նաեւ դասախօսութիւն-վիճարկում մը, մասնակցութեամբ՝ Արա Գրիգորեանի եւ Ծովինար Գեւոնեանի։ Իսկ Կիրակի օր, մանուկներուն կը ներկայացուի Անահիտ Սարգիսեանի «Ծալլապատիկ» բեմական հանդիսութիւնը։