Էներգետիկայի և բնական պաշարների նախարար Երվանդ Զախարյանի աշխատանքային այցը Կանադա
05-03-2015 14:49:18 | Կանադա | Տնտեսություն
Մարտի 1-ից 4-ը աշխատանքային այցով Կանադայում էր գտնվում ՀՀ էներգետիկայի և բնական պաշարների նախարար Երվանդ Զախարյանի գլխավորած պատվիրակությունը՝ մասնակցելու Տորոնտոյում կազմակերպվող հանքարդյունաբերության ոլորտում ամենամյա խոշորագույն միջազգային համաժողովին։
Պատվիրակությունն այցելեց համաժողովի շրջանակներում կազմակերպված առևտրային ներկայացումներին և ուսումնասիրեց Հայաստանում գործող մի շարք ընկերությունների տաղավարները, որոնց թվում էին «Dundee Precious Metals», «Lydian», «Centerra Gold» հանքարդյունաբերող կազմակերպությունները։
Նախարար Զախարյանը ելույթով հանդես եկավ «Price Waterhouse Coopers» խորհրդատվական ընկերության կազմակերպած միջոցառմանը, որին մասնակցեցին հանքարդյունաբերական համաժողովին ներկա գտնվող բարձրաստիճան պաշտոնյաները։ Նախարարը մանրամասն ներկայացրեց ՀՀ հանքարդյունաբերական դաշտը, ներդրումային հնարավորությունները և հրավիրեց միջազգային ներդրող հանրությանը` ներդրումներ կատարել Հայաստանում։
Այցի ընթացքում մասնավոր հանդիպումներ տեղի ունեցան ինչպես Հայաստանի տարածքում արդեն իսկ գործող, այնպես էլ տեղակայվելու հետաքրքրություն ցուցաբերող հանքարդյունաբերական ընկերությունների հետ։
Ինչպես տեղեկացնում են ՀՀ ԱԳՆ մամուլի, տեղեկատվության եւ հասարակայնության հետ կապի վարչությունից, պատվիրակությունը մասնակցեց նաև համաժողովի շրջանակներում կազմակերպվող հանքարդյունաբերական գիտաժողովին, որի ընթացքում ելույթով հանդես եկավ Կանադայում ՀՀ դեսպան Արմեն Եգանյանը։
ՀԱՅԵՐԵՆ
Русский
English
Դաս. հայերեն
French
