Տոնական օրերին կերկարացվի Երեւանի հասարակական տրանսպորտի աշխատանքի տեւողությունը
30-12-2010 17:42:00 | Հայաստան | Հասարակություն
ԵՐԵՎԱՆ, 30 ԴԵԿՏԵՄԲԵՐԻ, ՆՈՅՅԱՆ ՏԱՊԱՆ: Բնակչության տրանսպորտային սպասարկումը պատշաճ կազմակերպելու նպատակով տոնական օրերին որոշակի փոփոխություններ կլինեն Երեւանի ներքաղաքային երթեւեկությունը կազմակերպելու առումով:
Ըստ Երեւանի քաղաքապետարանի Տեղեկատվության եւ հասարակայնության հետ կապերի վարչության հաղորդագրության, 2010թ.-ի դեկտեմբերի 31-ին կերկարացվի մետրոպոլիտենի եւ ներքաղաքային վերգետնյա ուղեւորատար տրանսպորտի աշխատանքի տեւողությունը:
Մինչեւ հունվարի 1-ը Երեւանի մետրոպոլիտենը եւ ներքաղաքային վերգետնյա ուղեւորատար տրանսպորտը կաշխատեն մինչեւ ժամը 01:00-ը: Հունվարի 1-ից 9-ը ներառյալ ներքաղաքային հասարակական տրանսպորտի աշխատանքը կավարտվի ժամը 24:00-ին: Հունվարի 10-ից ներքաղաքային հասարակական տրանսպորտը կաշխատի ամենօրյա ժամանակացույցով: