07-10-2015 15:47:05 | Հայաստան | Մամլո հաղորդագրություն
Մշակութային բազմազանություն՝ Երևանի պետական բժշկական համալսարանում (ԵՊԲՀ). բուհում հոկտեմբերի 7-ին կազմակերպվել էր «Բարեկամություն» ավանդական ծրագիրը։
Բժշկական համալսարանի բազմազգ ուսանողները ներկայացնում էին իրենց մշակույթը, խոհանոցը, տարազը, սովորությունները, երգն ու պարը։ Առանձին տաղավարներով ներկայացված էին 14 երկրներ՝ Հայաստան, Արցախ, Ռուսաստան, Վրաստան, Հնդկաստան, Իրան, Ղազախստան, Հորդանան, Լիբանան, Ուկրաինա, Թուրքմենստան, Սիրիա, Հունաստան, ԱՄՆ:
ԵՊԲՀ 2-րդ կուրսի ուսանողուհի Սալմազ Սիրանն Իրանի Իսլամական Հանրապետությունից է, պարսկուհի է։ Արդեն 12 տարի բնակվում է Հայաստանում և շատ վարժ խոսում է հայերեն։ Ներկայացնելով իրանական մի քանի ուտեստներ՝ ասում է, որ դրանք հայկական կերակուրներից տարբերվում են հատկապես շատ օգտագործվող համեմունքներով։ Սալմազ Սիրանն ասում է՝ թեև հաճույքով ճաշակում է հայկական ճաշատեսակները, սակայն իր համար ավելի հոգեհարազատ են պարսկականը։ Իրեն հետաքրքրում է տարբեր ազգերի մշակույթը, և այս միջոցառումը միջմշակութային շփման հնարավորություն է տալիս։
«Բարեկամություն» ծրագիրը կյանքի է կոչվել Հայաստանի երիտասարդական հիմնադրամի և ԵՊԲՀ ուսանողական խորհրդարանի կողմից։
ՀԱՅԵՐԵՆ
Русский
English
Դաս. հայերեն
French
