Թուրք գրողի «Հոգիս Քեզնով կխայտա» գրքի համանուն փաստագրական թատերգութությունը կներկայացվի Հայաստանի թատրոններում (տեսանյութեր)
14-10-2015 18:25:55 | Հայաստան | Մշակույթ
Հայոց ցեղասպանության 100-րդ տարելիցի նախաձեռնությունների շրջանակում հոկտեմբերի 14-17-ը Նյու Յորքի «Վլադիմիր Քոչարյան» թատերախումբի մասնակցությամբ Հայաստանում առաջին անգամ ներկայացվելու է թուրք գրող Քեմալ Յալչընիի համանուն գրքի հիման վրա բեմադրված «Հոգիս Քեզնով կխայտա» փաստագրական թատերգութությունը: Այս մասին հոկտեմբերի 14-ին լրագրողների հետ հանդիպման ժամանակ տեղեկացրեց Հայաստանում առաջին անգամ գտնվող Ք. Յալչընը, ով 1990 թվականից հայկական հարցին նվիրված բազմաթիվ գրքեր է հրատարակել:
Նրա տեղեկացմամբ` իր հակաիշխանական կեցվածքի պատճառով տարիներ ի վեր հալածանքների է ենթարկվել ու ստիպված եղել փախչել Գերմանիա, որտեղ էլ քաղաքական ապաստան է ստացել:
Ք. Յալչընի խոսքերով` ինքը միայն հիսուն տարեկանում է իմացել, որ այն երկիրը, որտեղ ծնվել է, հայերի երկիրն է:
«Առաջին անգամ լինելով Հայաստանում՝ այցելեցի նաև Ծիծեռնակաբերդ: Շատ հուզված եմ, ցնցված»,- ասաց Ք. Յալչընը` հայերի ցավը համարելով իրենը:
Թուրք մտավորականի կարծիքով` Հայոց ցեղասպանությունն այժմ ևս շարունակվում է, քանի որ թուրքական իշխանությունները ժխտում են պատմական իրողությունը` տարիներ շարունակ տարածելով սուտ, կեղծիք, մերժողականություն:
«Որպեսզի դադարի ցեղասպանությունը, պետք է առերեսվել սեփական պատմության հետ, հակառակ դեպքում երբեք խաղաղություն չի լինի»,- ասաց նա:
Որպես Հայկական հարցի լուծման հավանական և արդար տարբերակ` Ք. Յալչընը համարում է հայկական հողերի վերադարձը, նյութական փոխհատուցումը և մշակութային արժեքների վերականգնմումը:
Նրա պնդմամբ` հարցը պետք է այնպիսի լուծում ստանա, որ հայերն այլևս դժգոհելու առիթ չունենան:
«Երանի ես լինեի Թուրքիայի վարչապետը, այդ հարցն անմիջապես կլուծեի»,- նշեց Ք. Յալչընը:
Վերջինիս խոսքերով` ինքը պաշտոնական առումով ոչինչ չի կարող անել, փոխարենը որպես մտավորական՝ գրիչն է օգտագործում իբրև զենք և շարունակելու է գրել և բարձրաձայնել պատմական իրողությունների մասին:
Ք. Յալչընիի կարծիքով` Թուրքիայի մայրաքաղաքի կենտրոնում պետք է տեղադրվի Ծիծեռնակաբերդի հուշահամալիրի նմանությամբ հուշակոթող, որի առջև կխոնրահվեն և ծաղիկներ կդնեն թուրքերն ամեն տարի ապրիլի 24-ին:
Անդրադառնալով «Հոգիս Քեզնով կխայտա» գրքին` Ք. Յալչընը նշեց, որ առաջին անգամ հրատարակելով Թուրքիայում, այդ գիրքի առաջին օրինակները ոչնչացվել են թուրքական իշխանությունների կողմից:
Թուրք գրողը կատարվածի առթիվ դիմում է դատարան, շահում դատը և դարձյալ սկսում հրատարակել գիրքն ու այն վաճառել Թուրքիայի գրախանութներում:
Գերմանաբնակ թուրք մտավորականը վերջին տարիներին զբաղվել է նաև դավանափոխ հայերի իրողությամբ և այդ մասին լայնածավալ աշխատանքներ հրատարակել, որոնցից շատերն արժանացել են մի շարք մրցանակների:
Տեղեկացվեց, որ ներկայացումները տեղի են ունենալու հոկտեմբերի 14-ին Գյումրիի Վ. Աճեմյանի, հոկտեմբերի 15-ին Վանաձորի Հ. Աբելյանի, իսկ հոկտեմբերի 17-ին Երևանի Կ. Ստանիսլավսկու անվան թատրոններում:
ՀԱՅԵՐԵՆ
Русский
English
Դաս. հայերեն
French
