Իրանը պատրաստ է սանկցիաների վերացումից հետո կտրուկ ավելացնել արտահանվող նավթի ծավալները
19-10-2015 17:20:40 | Իրան | Միջազգային
Սանկցիաների վերացման հաջորդ իսկ օրն Իրանը մտադիր է օրական արտահանել 500 հազար բարել նավթ: Այս մասին գրում է gazeta.ru-ն` վկայակոչելով Իրանի նավթի նախարար Բիժան Նամդար Զանգանեին:
Պատասխանելով հարցին, թե հնարավոր է այդ դեպքում ինչ-որ պայմաններ դրվեն Նավթ արտահանող երկրների կազմակերպության (անգլ.՝ The Organization of the Petroleum Exporting Countries; կրճատ՝ ՆԱԵԿ կամ ՕՊԵԿ) կողմից, վերջինս հայտարարել է, որ իրենք իրենց նավթն իրացնելու համար որևէ մեկի թույլտվության կարիքը չունեն և իրենց նավթը դուրս կգա շուկա:
Միևնույն ժամանակ նա ակնկալում է ՕՊԵԿ-ի կողմից ողջամիտ գործողությունների իրականացում, որոնք միտված կլինեն ապահովելու իրանական նավթի համաշխարհային շուկա դուրս գալը:
«ՕՊԵԿ-ի անդամ պետությունները և սպառողները ողջունում են իրանական նավթի վերադարձը շուկա»,- համոզված է իրանցի նախարարը:
Ավելին` իրանական իշխանությունները պատրաստ են համագործակցել ամերիկյան ընկերությունների հետ նավթագազային մասնաճյուղերի ստեղծման ընդհանուր ծրագրերի շրջանակներում, սակայն Զագանեի խոսքերով` ԱՄՆ-ի իշխանություններն առայժմ չեն թույլատրում ամերիկյան ընկերություններին դա անել: