Ղարաբաղյան հակամարտության կարգավորման գործընթացում Հայաստանը պետք է դառնա նախաձեռնող կողմ. Դավիթ Շահնազարյան
24-11-2015 18:12:48 | Հայաստան | Քաղաքական
«Ղարաբաղյան հակամարտության կարգավորման գործընթացում ժամանակն է, որ Հայաստանը պաշտպանվող սուբյեկտից պետք է վերափոխվի նախաձեռնող կողմի»,- համոզված է քաղաքական գործիչ, Տարածաշրջանային հետազոտությունների կենտրոնի փորձագետ Դավիթ Շահնազարյանը:
Ըստ նրա` վերջին 20 տարիների ընթացքում Հայաստանը բավականին հեռացել է ղարաբաղյան հակամարտության կարգավորման գործընթացից:
Դ. Շահնազարյանի կարծիքով` հակամարտությունը վերջնական լուծում չի գտնում ոչ միայն կողմերի՝ տրամաբանորեն հակառակ տեսակետների, այլև միջազգային բավարար երաշխիքների բացակայության պատճառով:
«Հայ-ադդրբեջանական բանակցային գործընթացում և Ադրբեջանի կեցվածքում լուրջ փոփոխություն տեղի ունեցավ 2012 թվականից կամ ավելի կոնկրետ Ռամիլ Սաֆարովին Ռուսաստանի օգնությամբ վերադարձնելուց և հերոսացնելուց հետո»,- ասաց Դ. Շահնազարյանը` հավելելով, որ Ադրբեջանի սանձարձակ պահվածքը պայմանավորած է Ռուսաստանի կողմից նրան զենք վաճառելու հանգամանքով:
Փորձագետի խոսքերով` Ռուսաստանը մեծ քանակությամբ ռազմամթերք է վաճառել Ադրբեջանին, ինչի արդյունքում խախտվել է Ադրբեջանի և Հայաստանի միջև եղած ռազմաքաղաքական բալանսը:
Դ. Շահնազարյանի պնդմամբ` Ադրբեջանի ներկայիս իշխանությունը հակահայկականությամբ փորձում է ադրբեջանական ինքնագիտակցության հիմք ստեղծել, որը հետևողական քաղաքականություն է: