ՀՀ մշակույթի նախարարության Հովհ. Շարամբեյանի անվան ժողովրդական ստեղծագործության և «Բարձր արվեստ» կերպարվեստի կենտրոնների նախաձեռնությամբ ս. թ. դեկտեմբերի 3-ին բացվել է երիտասարդ քանդակագործ և նկարիչ Արման Համբարձումյանի անհատական ցուցահանդեսը։ Այն կգործի մինչև ս. թ. դեկտեմբերի 7-ը՝ Հովհ. Շարամբեյանի անվան ժողովրդական ստեղծագործության կենտրոնում։ 

 «Առասպելներ» խորագիրը կրող ցուցահանդեսում ներկայացված են ավելի քան 20 քանդակներ և գրաֆիկական աշխատանքներ: 

 

Ստեղծագործական ուղիների որոնումների ճանապարհին Արման Համբարձումյանին հաջողվել է գտնել սեփական մտահղացումներն ու զգացողություններն արտահայող ինքնատիպ լեզու և դրսևորվել որպես անհատական ձեռագիր ունեցող ստեղծագործող: 

Հիշեցնենք, որ 2015 թվականին ՀՀ մշակույթի նախարությունը «Բարձր արվեստ» կերպարվեստի կենտրոնի հետ կազմակերպել է ևս երկու ցուցահանդես Կոմիտաս թանգարան-ինստիտուտում՝ ապրիլի 10-ից մայիսի 23-ը  և սեպտեմբերի 11-ից  հոկտեմբերի 24-ը։ Առաջին՝ «Ծաղկած ծիրանի» խորագրով ցուցահանդեսը նվիրված էր Հայոց ցեղասպանության 100-րդ տարելիցին և ներկայացնում էր Լևոն Թութունջյանի, Երվանդ Քոչարի, Սարգիս Մուրադյանի, Վարուժան Վարդանյանի, Ֆելիքս Եղիազարյանի, Սեյրան Խաթլամաջյանի, Զոհրաբ Միրզոյանի, Խաչիկ Մարտիրոսյանի, Գարիկ Կարապետյանի, Վարդիթեր Կարապետյանի, Ներսես Մելիքյանի, Էդուարդ Արծրունյանի, Գայանե Խաչատուրյանի, Արա Հայթայանի, Վլադիմիր Պետրոսյանի, Ռոբերտ Էլիբեկյանի, Աշոտ Հովհաննիսյանի ստեղծագործությունները։ 

Երկրորդ՝ «Մոդեռնից՝ պոստմոդեռն»  խորագրով ցուցահանդեսում ներկայացվել են  Սալվադոր Դալիի, Երվանդ Քոչարի, Լևոն Թութունջյանի, Մինաս Ավետիսյանի, Արա Ալեքյանի, Համլետ Հովսեփյանի,  Խաչատուր Մարտիրոսյանի, Աշոտ Հարությունյանի,  Ներսես Մելիքյանի, Նարեկ Ավետիսյանի, Մերի Մունի, Գարիկ Կարապետյանի, Արման Համբարձումյանի, Հարություն Զուլումյանի, Նարինե Զոլյանի ստեղծագործությունները: 

 

Նոյյան տապան  -   Մշակույթ