Բուն Բարեկենդանի տոնը մեկնարկելու է դիմակներով և տոնական քայլերթով
05-02-2016 13:13:40 | Հայաստան | Մշակույթ
Փետրվարի 7-ին Հայ առաքելական եկեղեցին նշելու է Բուն Բարեկենդանը, որը Մեծ պահքի առաջին կիրակին է, իսկ հաջորդ օրը սկսվում է Մեծ Պահքը: Այս մասին փետրվարի 5-ին լրագրողների հետ հանդիպմանը նշեց Արարատյան Հայրապետական թեմի (ԱՀԹ ) առաջնորդանիստ Սուրբ Սարգիս եկեղեցու հոգևոր հովիվ Տեր Պետրոս ավագ քահանա Մալյանը:
Նա տեղեկացրեց, որ արդեն երրորդ տարին է ինչ ԱՀԹ-ն կազմակերպում է մեծ տոնակատարություն, որի ընթացքում ավելանում է մասնակցող երիտասարդների թիվը: «Բուն Բարեկենդանը հոգեւոր տոն է , որը ներկայացնում է Ադամի դրախտային երանական կյանքը: Նա հրահանգ ուներ Աստծուց՝ գիտության ծառի պտղից չճաշակել: Նա օրինազանց է լինում եւ ճաշակելով գործում է առաջին մեղքը: Հետո տեղի է ունենում արտաքսում դրախտից: Բուն Բարեկենդանի հաջորդ կիրակին էլ կոչվում է Արտաքսման կիրակի: Մեծ պահքը զղջման ժամանակահատված է, երբ պահեցողությամբ վերականգվում է մարդու եւ Աստծո միջեւ կապը»,- ասաց քահանան միեւնույն ժամանակ նշելով, որ տոնի բաղկացուցիչ մասն են կազմում դիմակները:
Անդրադառնալով փետրվարի 7-ին կայանալիք միջոցառմանը, նա նշեց, որ այդ օրը ժամը 13:30-ից ԱՀԹ Առաջնորդանիստ Սուրբ Սարգիս եկեղեցու բակից սկսվելու է տոնական դիմակներով շքերթը. «Պարելով, երգելով շարժվելու ենք մինչեւ Ազատության հրապարակ, որտեղ տեղի է ունենալու մեծ միջոցառում: Տարբեր հարթակներում հանդես կգան ազգագրական խմբեր, վարչական շրջանների երգի ու պարի համույթներ, թատերական խմբեր, կազմակերպվելու են ազգային խաղեր:
Միջոցառման ընթացքում տեղի է ունենալու նաեւ բարեկենդանյան ուտեստների ցուցահանդես-վաճառք, որոնք պատրաստել են ԱՀԹ երիտասարդաց միությունների երիտասարդները: Վաճառքից ստացված ողջ հասույթը կօգտագործվի բարեգործական նպատակներով» :
Տեղեկացնենք, որ Բարեկենդանի տոնին կարելի է ուտել մսեղեն, կաթնեղեն, քաղցրավենիք, քանի որ վերջին օրն է՝ Պահք մտնելուց առաջ:
ՀԱՅԵՐԵՆ
Русский
English
Դաս. հայերեն
French
