Վահան Տերյանին ամբողջությամբ ներկայացնելու համար շատ անելիքներ կան. Առուշան Հակոբյան (տեսանյութ)
09-02-2016 19:58:45 | Հայաստան | Մշակույթ
Փետրվարի 9-ին լրանում է հայ մեծանուն գրող Վահան Տերյանի ծննդյան 131-ամյակը: Այս կապակցությամբ «Նոյյան Տապան»-ը զրուցեց գրողի անունը կրող մշակութային կենտրոնի տնօրեն Առուշան Հակոբյանի հետ:
Նրա տեղեկացմամբ` ամեն տարի այս օրը, «Վահան Տերյան» մշակութային կենտրոնն իրականացնում է «Տերյանի հետ» միջոցառումը, որի շրջանակներում պետական և մշակութային գործիչները, Վահան Տերյանի անվան թիվ 60 դպրոցի ուսուցիչները և աշակերտներն այցելում են Կոմիտասի անվան պանթեոն և ծակեպսակներ դնում Վ. Տերյանի հուշաքարին, խնկարկում, ինչպես նաև ասմունքում են հանճարեղ գրողի բանաստեղծություններից:
Ա. Հակոբյանի խոսքերով` մեկ ու կես տասնամյակ գործող կենտրոնն իր առջև նպատակ է դրել անպայման ապահովել այն բոլոր միջոցառումների իրականացումը, որոնք նվիրված են լինում Վ. Տերյանին կամ կապված են լինում նրա անվան հետ:
Ամեն տարի հուլիս ամսվա նախավերջին կիրակին Վ. Տերյանի ծննդավայր Գանձայում անցկացվում է Տերյանի օրեր, իսկ ամբողջ տարվա ընթացքում ինչպես Հայաստանի մարզերում, այնպես էլ Հանրապետությունից դուրս` Օրենբուրգում, Սանկտ Պետերբուրգում, Մոսկվայում անցկացվում են Վ. Տերյանին նվիրված միջոցառումներ, որոնք հանրության լայն զանգվածներին ներկայացնում են Վ. Տերյան գրողին, թարգմանչին, քնարերգուին:
Ա. Հակոբյանի փոխանցմամբ` հրատարակվել և շարունակվում են հրատարակվել Վ. Տերյանի ընտրանիները, նրան նվիրված ստեղծագործությունները, ստեղծվում են հուշակոթողներ, այդ թվում նաև «Վահան Տերյան» ֆիլմը:
ՀԱՅԵՐԵՆ
Русский
English
Դաս. հայերեն
French
