Կին դատապարտյալներն իրենց ուժերը չափեցին վեց տարբեր սպորտաձևերում (տեսանյութ)
24-05-2016 20:40:54 | Հայաստան | Հասարակություն
«Աբովյան» քրեակատարողական հիմնարկում կին դատապարտյալների մասնակցությամբ մայիսի 24-ին անցկացվեցին ամենամյա զանգվածային մարզական մրցումներ: 96 կին դատապարտյալներից 30-ը մրցեցին վազք, հեռացատկ, վոլեյբոլ, սեղանի թենիս, շաշկի և բազկամարտ մարզաձևերում:
ՀՀ սպորտի և երիտասարդության հարցերի նախարարության նախաձեռնությամբ, ՀՀ արդարադատության նախարարության քրեակատարողական վարչության և Աբովյանի քաղաքապետարանի աջակցությամբ անցկացված ամենամյա միջոցառման նպատակն է դատապարտյալների շրջանում ևս ամրապնդել առողջ ապրելակեպին հետևելու գաղափարը, որը նրանց կուղեկցի նաև ազատության մեջ հայտնվելուց հետո:
Անազատության մեջ գտնվող կանայք ամենամյա սպորտային միջոցառմանը մասնակցելու համար նախապես ցուցակագրվում են` ընտրելով նախընտրած մարզաձևը: Մինչ մարզական մրցումները, կին դատապարտյալներն ամեն օր երկուսից երեք ժամ տրամադրում են սպորտային պարապմունքներին` դրանք դարձնելով իրենց առօրյայի անբաժանելի մաս:
Ի դեպ` քրեակատարողական հիմնարկի սպորտդահլիճն ունի անհրաժեշտ մարզագույք և պայմաններ դատապարտյալների առօրյան սպորտային պարապմունքների միջոցով թեթևացնելու համար:
Նախորդ տարիներին այս մրցումներին մասնակցել են նաև անչափահաս դատապարտյալները, որոնց զգալի մասը պատիժը կրելուց հետո ազատ է արձակվել:
Ամենամյա մարզական այս մրցումների արդյունքներն ամփոփվելու են վաղը` մայիսի 25-ին, իսկ հաղթողները պարգևատրվելու են ՀՀ սպորտի և երիտասարդության հարցերի նախարարության հավաստագրերով ու Աբովյանի քաղաքապետարանի կողմից պատրաստված հուշանվերներով:
ՀԱՅԵՐԵՆ
Русский
English
Դաս. հայերեն
French
