Արարատբանկում պարտատոմսերի բաժանորդագրությունն իրականացվելու է հունիսի 6-17-ը
03-06-2016 18:14:29 | Հայաստան | Ֆինանսներ
Արարատբանկի գլխամասային գրասենյակում հունիսի 3-ին հայտարարվեց արժեկտրոնային պարտատոմսերի 11-րդ թողարկման մասին: Բանկի գործադիր տնօրենի տեղակալ Դավիթ Հարությունյանը ներկայացնելով պարտատոմսերի նախորդ թողարկումների արդյունքները` նշեց, որ Արարատբանկն արժեթղթերի շուկայի ամենաակտիվ մասնակիցներից է, և հաշվի առնելով նախորդ թողարկումների ժամանակ դրսևորված պահանջարկը` այս անգամ ևս առաջարկում է դոլարային պարտատոմսեր:
Նրա տեղեկացմամբ` 2015թվականին բանկի կողմից թողարկված պարտատոմսերով կատարվել է շուրջ 130 գործարք` 1մլն ԱՄՆ դոլար և 219 մլն ՀՀ դրամ ընդհանուր ծավալով:
Բանկի գործադիր տնօրենի տեղակալն անդրադառնալով նոր պարտատոմսերի թողարկմանը` նշեց, որ թողարկվել է 1 մլն ԱՄՆ դոլար ընդհանուր ծավալով 40.000 հատ անվանական, ոչ փաստաթղթային, արժեկտրոնային պարտատոմս` 25 ԱՄՆ դոլար անվանական արժեքով, 7 տոկոս տարեկան տոկոսադրույքով և 3 տարի շրջանառության ժամկետով: Պարտատոմսերի բաժանորդագրությունն իրականացվելու է հունիսի 6-ից մինչև 17-ը:
Պարտատոմսերը ցուցակվելու են “ՆԱՍԴԱՔ ՕԷՄԷՔՍ ԱՐՄԵՆԻԱ” ֆոնդային բորսայում և գնանշվելու են շուկա ստեղծողների միջոցով: Շուկայի մասնակիցներին հնարավորություն կընձեռվի արտարժութային պարտատոմսերով առքուվաճառք իրականացնելուց բացի, կնքել ռեպո գործարքներ: Արժեկտրոններով վճարումները կիրականացվեն եռամսյակը մեկ անգամ։
Ցանկացած ֆիզիկական կամ իրավաբանական անձ պարտատոմսերի գնման համար կարող է դիմել բանկի գլխամասային գրասենյակ կամ ցանկացած մասնաճյուղ: