Օրվա ընթացքում անընդհատ տեղեկություններ էին տարածվում, որ ուժայինները պատրաստվում են գրոհել զինված խմբի կողմից գրավված գունդը: Տեղեկություններ էին տարածվում, թե ոստիկանությունը կուտակումներ է սկսել գնդի մերձակա տարածքում:
Իրավիճակը լարվեց երեկոյան կողմ, երբ գնդի տարածքում հնչեցին կրակոցներ, եւ տեղեկություն եղավ, որ կան վիրավոր ոստիկաններ:
Գնդի մերձակա տարածքում այս տեղեկություններից հետո բավական մեծ բազմություն հավաքվեց, իսկ քիչ վերեւ՝ Սարի թաղում բախում տեղի ունեցավ ոստիկանների եւ քաղաքացիների միջեւ: Ըստ ոստիկանների, քաղաքացիները ցանկացել են մտնել արգելված տարածք, որի հետեւանքով էլ եղել է բախումը: Պարզվեց՝ 4 ոստիկանները վիրավորվել են այստեղ, վնասվածքները հրազենային չեն: Իսկ զինված խմբի անդամները հայտարարել են, որ իրենք օդ են կրակել՝ այդպիսով իրենց բողոքը հայտնելով ոստիկանության գործողությունների դեմ:
Երեկ հայտարարվեց, որ բանակցությունները շարունակվում են, հայտարարվեց նաեւ, որ ԱԱԾ-ն ինչ որ առաջարկներ է արել խմբին, եւ խումբը պետք է պատասխաներ ժամը 19.00-ին: Սակայն մանրամասներ չեն հաղորդվում՝ ինչ առաջարկներ են դրանք, եւ ինչ է պատասխանել խումբը: Ի դեպ, հենց ժամը 19.00-ից հետո էլ իրավիճակը սրվեց:
Երեկվա իրադարձությունները մոտավորապես ուրվագծեցին իրավապահների ու զինված խմբի մարտավարությունը: Ուժայինները պաշարման մեջ են վերցրել տարածքը եւ զինված խմբին կոչ են անում բանակցությունների արդյունքում հանձնվել, եւ կարծես թե այլ որոշում այս պահին չկա: Զինված ապստամբության կազմակերպիչներն, իրենց հերթին, փորձելու են իրավիճակը սրելով հասնել այն բանին, որպեսզի ավելի շատ զանգվածներ միանան իրենց:
Երեւանյան իրադարձություններն արդեն միջազգային արձագանք են գտնում: Ռուսաստանը դա գնահատել է որպես «կրիմինալի դրսեւորում», իսկ ԱՄՆ Պետդեպը դատապարտել է «բռնության միջոցով Հայաստանում քաղաքական փոփոխություններ իրականացնելու փորձերը»:
Ի՞նչ հանգուցալուծում է սպասվում, ում օգտին է աշխատում ժամանակը: Համենայնդեպս, կարծես թե իրադարձությունները զարգանում են ոչ խաղաղ հանգուցալուծման ճանապարհով:
ՀԱՅԵՐԵՆ
Русский
English
Դաս. հայերեն
French
