Հայաստանում հուլիսի 17-ից ծավալված իրադարձությունների, մասնավորապես, «Սասնա Ծռեր» զինված խմբի կողմից Ոստիկանության Երևան քաղաքի վարչության ՊՊԾ գնդի գրավման և բարձրաստիճան մի շարք ոստիկանների պատանդ պահելու խնդրով մտահոգված Հայաստանի մտավորականների ֆորումը հուլիսի 20-ին անցկացրեց նիստ, որի ընթացքում մասնակից մտավորականները փորձեցին քննարկել և վերլուծել ստեղծված իրավիճակը` առաջարկելով հնարավորինս անվնաս լուծում:

 

Հայաստանի մտավորականների ֆորումի այսօր տարածած հայտարարության մեջ, մասնավորապես, ասվում է. «Այսօր հրապարակային կոշտ ընթացք ստացած հակամարտությունը պատահական չէ, որ ծնվել է հենց Խորենացու անունը կրող փողոցում: Խնդրի ակունքները խորքային են՝ կապված վտանգված Հայաստանի և հայկականության հետ: Բազմաթիվ սպառնալիքների շաղախով պատված Հայաստանը պահանջում է ազգովի գիտակցել, որ ամեն մի շեղում հայկական օրակարգից հղի է անկանխատեսելի ողբերգական հետևանքներով: Մեր երիտասարդության փողոց դուրս գալը ցրեց Հայաստանի վրա կուտակված մխաշաղախ ամպը և հիշեցրեց մեր նախնյաց հանճարի խոսքը՝ ամեն մի գիշեր ունի լուսաբաց: Մենք, վաղվա ակնկալվող իրական Հայաստանի մտավորականը լինելու հպարտությամբ, նաև խորին մտահոգությամբ ու պատասխանատվությամբ            

 

ՀԱՅՏԱՐԱՐՈՒՄ ԵՆՔ

 

ա.  Հակամարտության հիմնական կրողը հայն ու Հայաստանն են և մեր ինքնությունը 

բ.   Կողմերին հորդորում ենք բացառել կամային ու անվերահսկելի որևէ գործողություն 

գ.  Երկրի ճակատագրով մտահոգ բոլոր ուժերին ու անձանց հորդորում ենք միավորվել ու գործել  համակարգված 

դ.  Հակամարտության լուծումը  պետք է լինի ոչ ստանդարտ, հայության շահերի թելադրած օրակարգով, հանրային իրական քննարկման արդյունքում

Այն պետք է փնտրել հայության և հայ պետականության առջև ծառացած հիմնախնդիրները համատեղ լուծելու համատեքստում: Մտավորականների ֆորումը իր պատրաստակամությունն է հայտնում մասնակցել և օժանդակել  ինչպես բանակցային, կազմակերպչական, այնպես էլ Երկրի օրակարգի ձևավորման խնդիրներին: 

 

 

Նոյյան տապան  -   Հասարակություն