Վարկյան առաջ պետք է ազատվել ներկայիս ԱԺ-ից և հրաժարվել կառավարությունից. «Զարթոնք» գաղափարական-քաղաքական ակումբի անդամներ (Տեսագրություն)

25-07-2016 12:00:00 | Հայաստան | Մամուլի սրահ

Հուլիսի 25-ին ժամը 12.00-ին «Նոյյան Տապան» լրատվական գործակալության մամուլի սրահում տեղի ունեցավ ասուլիս «Զարթոնք» գաղափարական-քաղաքական ակումբի անդամների մասնակցությամբ։

Թեման՝ «Հուլիսյան իրադարձությունները՝ ինչպես հանգուցալուծել խնդիրը»։

Բանախոսներն են՝

Արամ Գրիգորյան,

Գևորգ Արզումանյան,

Գևորգ Հովսեփյան,

Լևոն Թումանյան

«Զարթոնք» գաղափարական-քաղաքական ակումբի հայտարարությունը 2016թ. հուլիսյան իրադարձության վերաբերյալ.

Հայ ազգն ու Հայաստանը հայտնվել է հերթական փորձության առջև։ Դեռ ապրիլյան դեպքերի հետևանքները չվերացրած և դրանից համապատասխան հետևություններ չարած, մի խումբ մարդկանց կողմից իրականացվել է զինված ապստամբություն՝ քաղաքական պահանջներով։

Գնահատականներ չտալով բողոքի արտահայտման ձևին և հետևանքներին, գտնում ենք, որ կատարվածն անմիջական պատճառա-հետևանքային կապ ունի Հայաստանում տիրող քաղաքական, սոցիալ-տնտեսական և բարոյական իրավիճակի հետ։ Համատարած անարդարություններն ու կոռուպցիան, անօրինականություններն ու անպատժելիությունը, ծայրահեղ աղքատությունն ու մարդկանց անպաշտպանվածությունը, ապագայի նկատմամբ անվստահությունն ու արժանապատիվ ապրելու և արարելու անհնարինությունը, պատկան մարմինների անհեռատես և հաճախ ապազգային գործողությունները, արցախյան խնդրի կարգավորման պարտվողական քաղաքականությունը, վտանգելով երկրի ապագան, մարդկանց մղում են վճռական, նույնիսկ ծայրահեղ քայլերի։

Իշխող համակարգը վերջին քսան տարիներին ամեն ինչ արել է խորացնելու ազգի և իշխանության անջրպետը, խրախուսելով ազգային անվտանգությանն սպառնացող արտագաղթը, նաև կատարելագործելով բոլոր մակարդակների ընտրությունների համատարած կեղծումը, այլընտրանք չի թողել խաղաղ ճանապարհներով երկրի վիճակը փոփոխելու և բարելավելու համար։

Համոզված ենք, որ այս ամենի հիմնական մեղավորն ու պատասխանատուն իշխող համակարգի հաճախ հակապետական, իսկ <ընդիմադիր> հռչակվածների հիմնականում երկդիմի, պատեհապաշտ պահվածքն է: Անհասկանալի է նաև՝ երկրի քաղաքական-հասարակական արձագանքը, համատարած ազգային դժգոհության պայմաններում բացակայում է հանրային պահանջը։ Իշխանությունները դեռևս չեն գիտակցում, որ երկիրը հայտնվել է ծայրահեղ ծանր վիճակում, որ անհրաժեշտ են կտրուկ և արմատական բարեփոխումներ, հակառակ դեպքում ներքին խնդիրների ուժային մեթոդներով լուծումը, այդ թվում՝ արտաքին միջամտությամբ, չի փրկի նրանց և նրանց մերձավոր շրջապատին ազգի, օրենքի և պատմության դատաստանից։

Կոչ ենք անում.

իշխանություններին՝ վերջապես սթափվել և գործել հանուն ազգային շահի, պետության և ժողովրդավարության, իրավիճակից դուրս գալ փոխզիջումների միջոցով, բացառելով արյունահեղությունը:

հանրությանը՝ օրենքով չարգելված բոլոր միջոցներով պայքարել՝ հանուն հայ ազգի զարթոնքի և Հայաստանի պետականության ամրապնդման։

իսկ ներկա պահին՝ երկուստեք հրաժարվել ուժի կիրառումից ու սկսել բանակցությունը՝ ներգրավելով հանրության ներկայացուցիչների /միջնորդական խումբ, որին պատրաստ է մասնակցել նաև մեր ակումբը/։

Հասսցե՝ 0014, Երևան, Կոմիտասիպողոտա, 56 շենք, 161 տարածք,

Ֆեյսբուք` Զարթոնք ակումբ

Հեռախոս՝ 010 23 47 39, բջջային` 096 23 43 49,

Էլեկտրոնայինհասցե՝ zartonq-akumb@hotmail.com

Հավելյալ տեղեկությունների համար դիմել՝ 060-35-11-24 կամ 093-669-339 հեռախոսահամարներով՝ Մարի Պետրոսյանին։

Նոյյան տապան - Մամուլի սրահ