29-07-2016 13:51:09 | Հայաստան | Ի՞նչ է գրում մամուլը
ՀՀ քննչական կոմիտեում քննվող քրեական գործի շրջանակներում կալանավորվել է Խորենացի փողոցում ցույցին մասնակցած, Հանրային խորհրդի անդամ Արշակ Սադոյանի որդին՝ Արեգ Սադոյանը:
Այս մասին այսօր լրագրողների հետ հանդիպման ընթացքում ասաց ՀՀ ոստիկանության ՁՊՎ-ներում վերահսկողություն իրականացնող հասարակական դիտորդական խմբի անդամ Սուրեն Իսկանդարյանը:
Նրա խոսքով՝ Կոտայքի ՁՊՎ-ում հանդիպել են Արշակ Սադոյանի որդուն և, ըստ նրա՝ բերման են ենթարկել Հանրապետության հրապարակից՝ մեքենայից իջնելիս։ Երեկ ՁՊՎ-ից նրան տեղափոխել են դատարան և կալանավորել:
«Ուղղակի ահաբեկում են ժողովրդին, մասնավորապես իմ տղային ու ինձ»,- Tert.am-ի հետ զրույցում ասաց Արշակ Սադոյանը: Նրա խոսքով՝ իր տղան իրոք մասնակցել է Խորենացի փողոցում հանրահավաքին, սակայն որևէ անօրինական գործողություն չի արել:
«Իմ տղան որևէ ապօրինի գործողություն չի արել, բայց իրեն մեղադրել են, որ ինչ է թե ինչ-որ ոստիկանի շիթից բռնել է, այն դեպքում, երբ նկարում դեմքը նույնիսկ իրանը չէ»,-տարակուսանք հայտնեց Սադոյանը:
Նրա խոսքով՝ 8-9 հոգով գնացել են իրենց տուն, ներկայացրել են խուզարկություն կատարելու որոշում, նշված է եղել, որ փնտրում են Արեգ Սադոյանի հագին եղած շապիկն ու գլխարկը: Ըստ Արշակ Սադոյանի՝ իր համակարգիչն առգրավվել են: Խուզարկվել է նաև որդու ավտոմեքենան:
ՀԱՅԵՐԵՆ
Русский
English
Դաս. հայերեն
French
