Լրագրի  զրուցակիցն է «Ժառանգություն» կուսակցության փոխնախագահ Արմեն Մարտիրոսյանը

 

Պարոն Մարտիրոսյան, Ազատության հրապարակում վերջին հանրահավաքից հետո հնչած ելույթները բավական սուր արձագանք ունեցան, նաև նշվեց, որ ծրագրերը դեռ հստակեցված չեն։ Ինչպիսի՞ն է Ձեր կարծիքն այսօր Ազատության հրապարակում գոյություն ունեցող հարթակի վերաբերյալ, չի՞ստացվում, որ գնալով ավելի է մարում ծավալված շարժումը, մարդիկ պակասում են։

 

Շատ դրական կարծիք ունեմ հարթակի վերաբերյալ, որովհետև հարթակն, ըստ էության, փորձում է կանոնակարգել այն պայքարը, որ հասարակության մեջ դեռ կա և ավելի է շատանալու։ Մարդկանց մի փոքր նվազելը բացարձակ խնդիր չէ, որովհետև եթե հիշում եք, «Սասնա ծռերի» գործողությունից հետո առաջին հանրահավաքները էլի սակավամարդ էին, բայց շատ արագ թափ առան։ Նաև ակնհայտ է, որ քաղաքական գործընթացները ևս, ինչպես բնական յուրաքանչյուր գործընթաց, ունենում են վերելքներ ու վայրէջքներ, անընդհատ վերելքի մեջ չի կարող լինել։ Այս պարագայում ունենք մի իրավիճակ, երբ որոշակիորեն իսկապես լավ վերելք ունեցանք, իշխանությունները հասկացան այդ վերելքի վտանգավորությունը, դրա համար ապօրինությունների գնացին ի դեմս նախորդ համակարգող խորհրդի անդամների ձերբակալությունների, կալանքների, ինչպես նաև ժողովրդի նկատմամբ ահաբեկման գործընթացի։ Մենք տեսանք, թե ինչպիսի դաժան միջոցների դիմեցին իշխանությունները, որպեսզի այն առիթը, որը ձևավորվել էր և հզորանում էր, կարողանան ճնշել։ Հատկապես Սարի թաղում, ըստ էության, 2008-ից հետո նմանատիպ գործողություն չէր եղել։

 

Տեղի ունեցող այս ակցիաներն ինքնանպատակ չեն, մենք գիտենք, որ բազմաթիվ քաղբանտարկյալներ կան և նաև նրանց համար են այդ ակցիաները ընթանում։ Այլ է հարցը, որ հասարակության մի մասը կողմ քաշված է հետևում տեղի ունեցող զարգացումներին։

 

Երբ այսօր առավել շատ քաղբանտարկյալների մասին են խոսում, չի՞ ստացվում արդյոք շեղում բուն նպատակներից, որոնց համար հասարակությունը փողոց էր դուրս եկել, այդ թվում ինքնիշխանության վերականգնման:

 

Ոչ, ես ասացի, որ նաև քաղբանտարկյալների խնդիրն է դրված, բայց այո, այդ խնդիրը կա, և մենք դա վաղուց ենք արձանագրել։ Շատ լավ է, որ «Սասնա ծռերը» ևս արձանագրեցին Հայաստանի ինքնիշխանության խնդիրը։ Համենայնդեպս, ես որպես «Ժառանգության» ներկայացուցիչ արդեն այս դեպքում կարող եմ հպարտ կեցվածքով կանգնել, որովհետև մենք տարիներ շարունակ բարձրաձայնել ենք, եթե չասեմ, որ առաջինը հենց մենք ենք եղել ինքնիշխանության խնդիրը բարձրացնողը։ Հիմա շատ լավ է, որ «Սասնա ծռերը» ևս այդ մասին խոսք ասացին։ Ես մինչև բանտ գնալը և դրանից հետո անընդհատ շեշտել եմ Հայաստանի ինքնիշխանության խնդիրը, ազատության և անկախության խնդիրը ու չեմ կարծում, որ մենք շեղվել ենք այդ խնդրից, հակառակը, պայքարի այն փուլում, երբ նորից ակտիվություն լինի, բնականաբար, մենք նաև այդ խնդիրը պետք է առաջնային լուծենք։ Այստեղ որևէ երկրորդ կարծիք չի կարող լինել։

 

Իսկ դուք մտավախություն չունե՞ք, որ ըստ էության, հատվածական պայքար է սպասվում, մասնավորապես, սեպտեմբերի սկզբին ազատամարտիկներն են հանրահավաք անելու, հետո «Քաղաքացիական պայմանագիրը»։

 

Բացարձակ մտավախություն չունենք, որովհետև էլի են եղել դեպքեր, երբ առանձին հանրահավաքներ են տեղի ունեցել, բայց երբ հասարակությունն սկսել է ակտիվ մասնակցություն ունենալ, ինքը գլխավոր ուղղությունը ճիշտ գտել է և ըստ դրա շարժվել։ Նույնը եղավ նաև այս վերջին ժամանակահատվածում, հետևաբար որևէ մտահոգություն չունեմ, ով ցանկանում է, երբ ցանկանում է, կարող է այդ պայքարը տանել։ Ալեք Ենիգոմշյանն էլ հայտարարեց, որ մենք միայն ուրբաթ օրերին ենք զբաղեցնում Ազատության հրապարակը, մնացած ժամանակ այն ազատ է, և ով երբ ցանկանում է, կարող է այն օգտագործել։

 

Իսկ արդյունքների հնարավո՞ր է հասնել մասնատված։

 

Արդյունքների հասնելու համար ոչ թե քաղաքական ուժերն են շատ մեծ կարևորություն ստանում, այլ հասարակությունը։ Դրա համար երբ հասարակությունը ելնում է պայքարի, ինքն իր համար քաղաքական ուժ, քաղաքական կամ հասարակական խումբ գտնում է։ Եվ ով պետք է իրեն, նրան էլ ասում է՝ կազմակերպիր։ Այնպես որ, սա բացարձակ ինձ համար խնդիր չէ։ Եվ եթե ազատամարտիկներն էլ են ուզում ակտիվանալ, ողջունելի է, ես որևէ խնդիր չեմ տեսնում։

 

Իշխող կուսակցության ներկայացուցիչները վերջին շրջանում շատ են կրկնում, որ հիմա ավելի շատ պայքար է ընթանում ընդդիմադիրների միջև, քան իշխանության դեմ։ Այս ընթացքում մենք տեսանք հակամարտություն Ձեր և Նիկոլ Փաշինյանի միջև։

 

Ես որևէ մեկի հետ այսքան ժամանակ հակամարտության մեջ չեմ եղել և Նիկոլ Փաշինյանի հետ էլ հակամարտության մեջ չեմ։ Ընդամենը Նիկոլը իմ ազատազրկման ժամանակ հարցադրումներ էր արել, և ես այս հարցադրումներին եմ պատասխանել։ Դուք չեք կարող գտնել որևէ տեղ, որ ես որևէ մեկի հետ հակամարտության մեջ եղած լինեմ,  կամ «Ժառանգությունը» որևէ այլ քաղաքական ուժի հետ հակամարտության մեջ լինի։ Մենք ընդհանրապես չենք պատասխանում մեր ուղղությամբ նետված քննադատությանը, եթե այն երկարատև չի լինում և չափը անցած չի լինում։ Ինչ վերաբերում է Վահրամ Բաղդասարյանի ասածին, ապա իշխանությունների հարցերի պատասխանը լավագույնը տալիս է այս իրավիճակը։ Իրենք որևէ բան ճիշտ չեն անում, չեն ասում, և դրա վառ ապացույցը դատարանների անազատությունն է, հասարակության բևեռացվածությունն է, «Սասնա ծռերի» գործողություններն են։ Այս բոլորն իրենց հանցագործությունների, թերացումների պատասխանն է և հաստատումը։ Դրա համար ասել, որ ընդդիմադիրները պայքարում են միմյանց դեմ, նման բան գոյություն չունի, ընդդիմությունը երբեք ընդդիմության դեմ չի պայքարել, և եթե իրենց ստեղծած ընդդիմություններն են ընդդիմության դեմ պայքարում, դա դեռ չի նշանակում, որ ընդդիմությունը ընդդիմության դեմ է պայքարում։

 

Իշխանությունները հիմար չեն, շատ խելացի են և կարողանում են ինտրիգների դաշտ ստեղծելով, վերացնելով քաղաքական դաշտը՝ փորձում են պահել իշխանությունը, բայց քաղաքական դաշտը վերացնելով՝ իրենք ստացան «Սասնա ծռեր», որոնք հայրենասեր տղաներ են և խնդիր չունեին հեղաշրջման։ Իրենց կատարած քայլերի արդյունքում է չէ, որ վնասեցին քաղաքական դաշտը, քաղաքական ուժերին վնասեցին՝ մի մասին գնելով, մի մասին նստեցնելով։ Վերջում այդ քաղաքական դաշտը վերափոխվում է զինված քաղաքական պայքարի դաշտի։

 

 

---