2016 թվականի հոկտեմբերի 8-ին, Հայ Առաքելական Սուրբ Եկեղեցին նշեց Սուրբ թարգմանիչ Վարդապետների տոնը: Այս տոնը հիրավի հայ ժողովրդի սիրված և նվիրական տոներից մեկն է:
Տոնի առիթով Թբիլիսիի Սուրբ Էջմիածին եկեղեցում, Վիրահայոց թեմի առաջնորդ Գերաշնորհ Տեր Վազգեն եպիսկոպոս Միրզախանյանի հանդիսապետությամբ, մատուցվեց Սուրբ և Անմահ Պատարագ:
Սուրբ Պատարագին ներկա էին մանկավարժներ, թարգմանչական ոլորտի աշխատողներ, ի գլուխ ունենալով բանաստեղծ-թարգմանիչ Գիվի Շահնազարին:
Պատարագին ներկա էր նաև Վրաստանում ՀՀ դեսպանության խորհրդական Կարեն Մելիքյանը:
Հընթացս Սուրբ Պատարագի, Պատարագիչը՝ Վիրահայոց թեմի առաջնորդի օգնական հոգեշնորհ Տեր Խորեն վարդապետ Հովհաննիսյանը, հավուր պատշաճի քարոզ խոսեց օրվա խորհրդի մասին: Հայր Սուրբը անդրադարձ կատարեց հայ գրերի ստեղծման պատմական ժամանակաշրջանին, հայոց գրերի գյուտը անվանելով պատմականորեն շրջադարձային: Արժևորելով թեմի ներդրումը Վիրահայոց ազգային և հոգևոր կրթության ոլորտում, Տեր Խորեն վարդապետը Եկեղեցին, լեզուն և մշակույթը անվանեց ազգի ինքնությունը պահպանելու գլխավոր երաշխիքներ: Պատարագիչը ներկա հավատացյալներին հորդորեց տարածել թարգմանիչ վարդապետների կողմից ստեղծված հայոց գրերը, սերունդներին փոխանցել մեր մեսրոպատառ ոսկեղենիկ լեզուն:
Հավարտ Սուրբ Պատարագի, Վիրահայոց թեմի հոգևոր դասը Խոջիվանքի Հայոց Մեծերի Պանթեոնում կատարեց հոգեհանգստյան արարողություն՝ այստեղ հանգչող հայոց մեծերի հոգու խաղաղության համար:
Ախալքալաքի շրջանի «Սուրբ խաչ» եկեղեցում թարգմանչած տոնին նվիրված Սուրբ և Անմահ Պատարագ մատուցեց Սամցխե-Ջավախքի ընդհանուր առաջնորդական փոխանորդության Ախալքալաքի և մերձակա գյուղերի հայության հոգևոր հովիվ արժանապատիվ Տեր Տաթև քահանա Մարուքյանը:
ՀԱՅԵՐԵՆ
Русский
English
Դաս. հայերեն
French
