Դոնի-Ռոստովում ՀՀ գլխավոր հյուպատոսի այցը Հյուսիսային Օսիա - Ալանիա
27-10-2016 19:55:25 | Հայաստան | Մամլո հաղորդագրություն
Հոկտեմբերի 24-25-ը Դոնի Ռոստովում ՀՀ գլխավոր հյուպատոս Վարդան Ասոյանն աշխատանքային այցով գտնվում էր ՌԴ Հյուսիսային Օսիա – Ալանիա Հանրապետությունում:
Այցի շրջանակներում տեղի ունեցավ ՀՀ գլխավոր հյուպատոսի և Հյուսիսային Օսիայի ղեկավար Վյաչեսլավ Բիտարովի հանդիպումը, որին մասնակցում էին նաև Հյուսիսային Օսիա-Ալանիայի առողջապահության նախարար Միխայիլ Ռատմանովը, ներքին գործերի նախարար Միխայիլ Սկոկովը և ազգային հարաբերությունների նախարար Ասլան Ցուցիևը:
Հանդիպմանը քննարկվեցին Հարավային Օսիայի և ՀՀ մարզերի միջև ապակենտրոնացված համագործակցության զարգացմանն ու խորացմանն առնչվող հարցեր:
ՀՀ գլխավոր հյուպատոս Վարդան Ասոյանը շնորհակալություն հայտնեց տեղի իշխանություններին` հոկտեմբերի 14-ին Բեսլան-Վլադիկավկազ շրջանցային մայրուղու վրա տեղի ունեցած խոշոր ավտովթարին արագ արձագանքելու և տուժածներին ցուցաբերած օգնության համար:
Իր հերթին Վյաչեսլավ Բիտարովը ներկայացրեց վթարի հետևանքով ստեղծված իրավիճակն ու ձեռնարկվող քայլերը և հավաստիացրեց, որ տուժած քաղաքացիներին ցուցաբերվում է անհրաժեշտ բուժօգնություն:
Այցի շրջանակներում ՀՀ գլխավոր հյուպատոսն այցելեց Բեսլանի Հյուսիս-կովկասյան բժշկական կենտրոն, որտեղ գտնվում են Բեսլան-Վլադիկավկազ շրջանցային մայրուղու վրա տեղի ունեցած ավտովթարից տուժած ՀՀ քաղաքացիները:
Վարդան Ասոյանը բժշկական կենտրոնում հանդիպեց տուժածներին և բժշկական հաստատության ղեկավարությանը, որի հետ քննարկվեցին ձեռնարկվող բժշկական միջոցառումներին և հետագա քայլերին առնչվող հարցեր:
ՀԱՅԵՐԵՆ
Русский
English
Դաս. հայերեն
French
