Անձնակազմի պատրաստվածության շնորհիվ հնարավոր կլինի 80 տոկոսով կանխել կիբերանվտանգության խոցելիությունը. Գրիգորի Սաղյան (տեսանյութ)
29-11-2016 14:15:24 | Հայաստան | Գիտություն եւ տեխնոլոգիաներ
«Անձնակազմի պատրաստվածության շնորհիվ հնարավոր կլինի 80 տոկոսով կանխել կիբերանվտանգության խոցելիությունը»,- նշում է «Ինտերնետ հանրություն» ՀԿ փոխնախագահ Գրիգորի Սաղյանը:
Վերջինս տեղեկատվության պաշտպանության միջազգային օրվա կապակցությամբ հրավիրված ասուլիսի ընթացքում լրագրողների ուշադրությունը հրավիրեց տեղեկատվական անվտանգություն և կիբերանվտանգություն հասկացությունների միջև առկա տարբերություններին:
Ըստ նրա` տեղեկատվական անվտանգությունն օգտագործվում է տարբեր իմաստներով և ենթադրում է նաև բովանդակային վերահսկողություն, մինչդեռ կիբերանվտանգությունը դա կիբերտարածքում ամբողջականության, մատչելիության և խորհրդապահության ապահովումն է:
«Կիբերտարածք հասկացությունը ևս ունի երկու մեկնաբանություն. Այն արևմտյան տեսանկյունից չունի սահմաններ և սահմանվում է որպես մի միջավայր, որը գոյություն չունի ֆիզիկապես, սակայն բաղկացած է ինտերնետից և ինտերնետին միացված սարքավորումներից»,- ասաց Գ. Սաղյանը` հավելելով, որ Հայաստանը 2006 թվականին միանալով Բուդապեշտի կոնվեցիային` ընդունել է, որ կիբերտարածքը չունի սահմաններ:
Նրա խոսքերով, այդպիսով թույլատրվում է կիբերանվտանգությամբ զբաղվող արտասահմանյան գործակալություններին համապատասխան վերապահումներով քննչական գործողություններ կատարել այն կիբերտարածքում, որը գտնվում է Հայաստանում:
«Ինտերնետ հանրություն» ՀԿ փոխնախագահի փոխանցմամբ` Ռուսաստանը ևս ժամանակին միացել է այս կոնվեցիային, սակայն մեկ տարի հետո հետ է կանգնել իր ստորագրությունից` համարելով, որ որևէ օտարերկրյա գործակալություն իրավունք չունի իր կիբերտարածքում իրականացնել քննչական գործողություններ հակերներին հայտնաբերելու համար:
«Ավելի կտրուկ քայլեր է իրականացրել Չինաստանը, որն իր կիբերտարածքը սահմանափակել է չինական պատով. Այստեղ աշխատում են տարբեր գնահատականներով 2-3 մլն մարդիկ, մի քանի միլիոն համակարգիչներ, որոնք ապահովում են Չինաստանի կիբերտարածքի անխոցելիությունը»,- նշեց Գ. Սաղյանը` տեղեկացնելով, որ բացի Չինաստանից, Ռուսաստանը, Իրանը ևս ձգտում են ունենալ առանձին կիբերտարածք:
Անդրադառնալով հակերային հարձակումներին և Հայաստանում տեղեկատվական անվտանգությանը` մասնագետը նշեց, որ այսօր Հայաստանը հասել է մի վիճակի, երբ ըստ Կասպերսկու լաբորատորիայի` ամեն օր ի հայտ են գալիս շուրջ 319 հազար վիրուսներ:
Ըստ նրա` վիրուսների տարածման համար հակերներն օգտագործում են սոցիալական ինժեներիան, երբ մարդկանց թուլություններն օգտագործվում են հենց նրանց դեմ:
«Հայաստանի պաշտպանվածությունը ոչ միայն մեզ է հետաքրքրում ու մտահոգում, այլև մեր կառավարությանը, դա է պատճառը, որ ավելի քան մեկ տարի է, ինչ գործում են մի քանի հանձնաժողովներ, որոնք փորձում են մշակել տեղի կիբերանվտանգության համեմատաբար բարվոք վիճակ»,- ասաց Գ. Սաղյանը` շեշտելով, որ Հայաստանում դեռևս չկա կոնկրետ մոտեցում կիբերանվտանգության և տեղեկատվական անվտանգության կառավարման հարցում:
Ի դեպ` Հայաստանում խոցելիության առումով համեմատաբար լավ վիճակում է գտնվում բանկային համակարգը:
ՀԱՅԵՐԵՆ
Русский
English
Դաս. հայերեն
French
