Հրաչյա Ռոստոմյանն ընդունել է ՀՀ-ում ՌԴ արտակարգ և լիազոր դեսպան Իվան Վոլինկինին
09-12-2016 19:07:08 | Հայաստան | Սպորտ
ՀՀ սպորտի և երիտասարդության հարցերի նախարար Հրաչյա Ռոստոմյանն ընդունել է Հայաստանի Հանրապետությունում Ռուսաստանի Դաշնության արտակարգ և լիազոր դեսպան Իվան Վոլինկինին:
Կողմերը քննարկել են Հայաստանի Հանրապետությունում գեղասահքի զարգացման հեռանկարները: Դեսպանը նախարարին է փոխանցել այդ ծրագրի իրագործման առաջարկությունների փաթեթը՝ կազմված ԽՍՀՄ և ՌԴ վաստակավոր մարզիչ Ելենա Չայկովսկայայի կողմից:
«2016-2017 թվականները որոշիչ են 2018 թվականին Հարավային Կորեայում կայանալիք ձմեռային օլիմպիական խաղերից առաջ: Հենց այս ընթացքում է անհրաժեշտ ակտիվ աշխատել ձմեռային օլիմպիական խաղերին լավ մասնակցելու համար»,- ասել է նախարար Հ․ Ռոստոմյանը:
Դեսպանը ներկայացրել է նաև առաջարկություն՝ Երևանում գործող Իրինա Ռոդնինայի անվան գեղասահքի մարզադպրոցի մարզիչների որակավորման բարձրացման վերաբերյալ: «Հնարավոր է Երևանում կազմակերպել սեմինարներ, որոնք կվարեն Չայկովսկայայի «Սպորտային վարպետության դպրոցի» մասնագետները: Նրանք միաժամանակ կարող են այդ ընթացքում մարզել նաև հայ մարզիկներին»,- իր խոսքում նշել է դեսպան Վոլինկինը:
ՀԱՅԵՐԵՆ
Русский
English
Դաս. հայերեն
French
