ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը Մոսկվա կատարած այցի շրջանակներում այցելել է «Ռոսկոսմոս» դաշնային տիեզերական գործակալություն, հանդիպել ընկերության գլխավոր տնօրեն Իգոր Կոմարովին:
Հանդիպման ընթացքում քննարկվել են երկկողմ համագործակցությանը, այդ թվում՝ Հայաստանի տիեզերական մոնիտորինգի կենտրոնի մոդերնիզացմանն առնչվող մի շարք հարցեր։ Ըստ ձեռք բերված համաձայնության՝ առաջիկայում «Ռոսկոսմոս»-ի մասնագետները կգործուղվեն Հայաստան, տեղում կուսումնասիրեն և կանցկացնեն
տեխնիկական աուդիտ, կներկայացնեն առաջարկներ, թե ինչ աշխատանքներ պետք է իրականացվեն կենտրոնի հետագա արդյունավետ շահագործման համար:
Վահան Մարտիրոսյանը և Իգոր Կոմարովը քննարկել են նաև Բյուրականի աստղադիտարանի և «Ռոսկոսմոս»-ի միջև հետագա շարունակական աշխատանքների, Ռուսաստանի հետ համատեղ ուսանողական արբանյակներ ուղեծիր ուղարկելու վերաբերյալ ծրագրերը, Հայաստանում «ԳԼՈՆԱՍՍ» նավիգացիոն համակարգի
ներդրման հնարավորությունները։
«ԳԼՈՆԱՍՍ» արբանյակային նավիգացիոն համակարգը աշխարհում լայն տարածում ստացած ամերիկյան «GPS» համակարգի ռուսաստանյան անալոգն է։
ՀԱՅԵՐԵՆ
Русский
English
Դաս. հայերեն
French
