Լրագրի զրուցակիցն է Ժառանգություն կուսակցության փոխնախագահ Արմեն Մարտիրոսյանը

- Պարոն Մարտիրոսյան, «Ժառանգություն» կուսակցությունը պաշտոնապես բանակցություններ վարո՞ւմ է տարբեր քաղաքական ուժերի հետ դաշինք կազմելու հարցով՝ հաշվի առնելով, որ նախօրեին Վարդան Օսկանյանը չի հերքել, անգամ հաստատել է, որ Րաֆֆի Հովհաննիսյանի հետ քննարկումներ են եղել միասնական դաշինք կազմելու հարցով։ Այս փուլում որքանո՞վ եք իրատեսական համարում նրանց հետ դաշինքը։

- Որևէ քննարկման վերաբերյալ այս պահին որևէ տեղեկատվություն չեմ կարող տալ և կարծում եմ՝ ճիշտ էլ չէ։ Այս փուլում որևէ անուն ոչ կհաստատեմ, ոչ կժխտեմ։ Միայն կասեմ հետևյալը. «Ժառանգությունը» ունի խնդիր և այդ խնդիրը ոչ թե այն է, որ «Ժառանգությունը» խորհրդարան անցնի, նման խնդիր չունի մեր կուսակցությունը, այլ որ Հայաստանը վերականգնի իր ինքնիշխանությունը և երկրում տեղի ունենան արմատական բարեփոխումներ։ Այդ բարեփոխումները, բնականաբար, պետք է սկսեն իշխանափոխության գործընթացից։ Հիմա «Ժառանգությունն» ունի նպատակ, որ լայն համախմբմամբ մասնակցենք նմանատիպ պայքարի։ Եթե կլինի նման համախմբում, ուժային կենտրոնի ձևավորում, որը հնարավորություն կտար իշխանափոխության, արմատական բարեփոխումների, ինքնիշխանության վերականգնման համար պայքարել, ապա «Ժառանգությունը» այդպիսի պայքարի մեջ կմտնի։ Հակառակ պարագայում «Ժառանգությունը» շատ հանգիստ կարող է մասնակցել ընտրությունների և նորից խորհրդարանում ներկայացված լինել։

- Տարիներ շարունակ ինչ-որ կոնկրետ մեկի հետ չենք համագործակցել։ Տարբեր ժամանակներում տարբեր քաղաքական ուժերի, տարբեր գործիչների հետ ենք համագործակցել։ Հիմա եթե ստացվեր այդ համագործակցությունը, բնականաբար, Սերժ Սարգսյանն այսօր նախագահ չէր լինի, ՀՀԿ-ն էլ իշխող մեծամասնություն չէր լինի, մենք էլ այսպիսի խայտառակ սոցիալ-տնտեսական, դեմոգրաֆիկ ցուցանիշներ չէինք արձանագրի։ Դրա համար, բոլոր դեպքերում, եթե կա համատեղ պայքարելու հնարավորություն, մենք միշտ կողմ ենք եղել դրան։

-Ձեր կուսակցության ներսում կա՞ն տարաձայնություններ այս հարցի հետ կապված՝ հաշվի առնելով, որ Զարուհի Փոստանջյանը դեմ է դաշինքներին։

- Այդ ուժերի հետ դուք ճանապարհ եք անցել, երբ խնդիրները նույնկերպ ձևակերպել են, հետո կեսից հրաժարվել են։

- Եթե ես համոզված լինեի, որ «Ժառանգությունը» միայնակ կարող է Հայաստանում իշխանափոխություն իրականացնել և կարող է վերականգնել Հայաստանի ինքնիշխանությունը, ես միանգամից կպատասխանեի, որ որևէ մեկի հետ համատեղ աշխատանք ինձ պետք չէ։ Բայց քանի որ գիտեմ, որ դրա համար համախմբում է պետք, «Ժառանգությունը» միայնակ չի կարող դա իրականացնել, ես ցանկացած դեպքում, երբ կա նպատակի հետ կապված նույնականացում և համատեղ պայքարելու հնարավորություն, ես այդ համատեղ պայքարի ուղղությամբ ընթանում եմ։

- Եթե այնպես ստացվի, որ «Ժառանգությունն» այդպես էլ որևէ ուժի հետ դաշինք չկազմի, «Ժառանգությունը» միևնույն է միայնակ մասնակցելո՞ւ է ընտրություններին։

- Իհարկե, մասնակցելու է։ «Ժառանգությունը» խորհրդարանում լինելու կարիք չունի, դա ակնհայտ է ոչ միայն իմ, այլև շատ-շատերի համար։ Այս տարիների ընթացքում, «Ժառանգությունը» որևէ մեկի մոտ կասկած չի թողել, որ պայքարող, սկզբունքային կուսակցություն է, որ «Ժառանգությունում» կան բազմաթիվ նվիրյալներ, որոնք պայքարը միշտ տանում են։ Հետևաբար խորհրդարան մտնելու խնդիր չունենք, բայց ունենք խնդիր երկիրը այս աղետալի վիճակից փրկելու համար։

- Ե՞րբ պարզ կլինի «Ժառանգության» վերջնական որոշումը՝ մասնակցել ընտրություններին, գնալ դաշինքներով, թե ոչ։