Սահմանամերձ Խնձորուտ գյուղն ամբողջությամբ լուսավորվել է
20-12-2016 14:32:49 | Վայոց ձորի մարզ | Կազմակերպություններ
Վայոց Ձորի մարզի Խնձորուտ գյուղը սահմանակից է Նախիջևանին: Խորհրդային հասարակարգի փլուզումից հետո այստեղ արտաքին լուսավորության քայքայված ենթակառուցվածքներ են եղել։ Տեղում փորձել են լուծել խնդիրը և համայնքային միջոցներով լուսավորել են մի քանի փողոց, սակայն արդյունքը գոհացուցիչ չի եղել. սպառվել է սպասվածից ավելի շատ էլեկտրաէներգիա՝ ապահովելով ոչ բավարար լուսավորություն: Լուսարձակների մեծ մասն էլ շարքից դուրս է եկել՝ առաջացնելով դրանք նորերով փոխարինելու և հետևաբար՝ լրացուցիչ ծախսեր կատարելու անհրաժեշտություն:
Վայրի բնության և մշակութային արժեքների պահպանման հիմնադրամի (FPWC) և ՎիվաՍել-ՄՏՍ-ի համագործակցությամբ իրականացվող՝ «Այլընտրանքային էներգիա» նախագծի շրջանակում գյուղում մեկ տարի առաջ ծրագիր է մեկնարկել: Առաջին փուլով տեղակայվել է 60 LED լուսարձակ՝ լուսավորելով գյուղի հիմնական փողոցները. 1800մ երկարությամբ տարածություն։
Համագործակցող կողմերն ավարտել են նաև ծրագրի երկրորդ փուլը: Այս անգամ տեղակայվել է 34 LED լուսարձակով արտաքին լուսավորության համակարգ: Լուսավորվել է 3200մ երկարությամբ տարածություն։ Ամբողջ ծրագրի արդյունքում տեղադրվել է 94 լուսարձակ, լուսավորվել 5000մ տարածություն՝ ընդգրկելով ամբողջ գյուղը: Խնձորուտի բնակիչները Նոր տարին կդիմավորեն ամբողջությամբ լուսավորված գյուղում:
Համակարգի գործարկմանը մասնակցել են ՎիվաՍել-ՄՏՍ-ի գլխավոր տնօրեն Ռալֆ Յիրիկյանը, FPWC-ի հիմնադիր Ռուբեն Խաչատրյանը և բնակիչները:
«Այս ծրագիրն ունի կարևոր առանձնահատկություն. այն չի սահմանափակվում կոնկրետ երևացող արդյունքով: Տարիներ հետո հնարավոր կլինի արձանագրել դրա բնապահպանական օգուտը, մինչդեռ ֆինանսականը՝ շատ արագ: Հատկապես սահմանին ապրող մեր հայրենակիցների համար այս պահին առավել առաջնային է ծախսերի կրճատումը: Մենք ձգտում ենք թեթևացնել և՛ բնակչի, և՛ գյուղի, և՛ համայնքի բեռը: Տնտեսված միջոցներով տեղում կարող են լուծել մեկ այլ խնդիր: Հենց սա է պատասխանատու մոտեցումը, որով մենք առաջնորդվում ենք գործունեության առաջին իսկ օրերից»,-ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:
Արտաքին լուսավորության էներգախնայող համակարգի ներդրումը համայնքային զարգացման կարևոր նախապայման է: Ծրագրի արդյունքում էապես կկրճատվեն համայնքների բյուջետային ծախսերը՝ թույլ տալով դրանք ուղղել այլ խնդիրների լուծմանը: Բնապահպանական բաղադրիչով հանդերձ՝ էներգախնայող տեխնոլոգիաների կիրառումը թույլ կտա ոչ միայն թեթևացնել Զառիթափ համայնքի ֆինանսական բեռը, այլև՝ աշխուժացնել Խնձորուտ գյուղի կյանքը։
Բնապահպանական և էներգախնայող LED լուսարձակների շահագործումը տնտեսապես արդյունավետ է բյուջետային համեստ միջոցներ ունեցող գյուղերի համար: Այսպիսի համակարգի օգտագործումը 80 տոկոսով կնվազեցնի էներգիայի ծախսը՝ թեթևացնելով մարդկանց ֆինանսական բեռը:
Լուսարձակներն ամռանը գյուղի փողոցները կլուսավորեն 21:00-ից մինչև 00:00, իսկ ձմռանը՝ 18:00-ից մինչև 23:00: Տոնական օրերին լուսավորություն կապահովվի ամբողջ գիշեր:
ՀԱՅԵՐԵՆ
Русский
English
Դաս. հայերեն
French
