Նոր տարին կրկին դիմավորում ենք բանտերում փակված քաղաքական բանտարկյալներով. Սարգիս Հացպանյան (տեսանյութ)
26-12-2016 17:58:30 | Հայաստան | Հասարակություն
«Նոր տարին կրկին դիմավորում ենք մեր երկրի բանտերում փակված քաղաքական բանտարկյալներով»,- նշում է տարածաշրջանային հարցերով փորձագետ և վերլուծաբան Սարգիս Հացպանյանը` ամփոփելով անցնող տարին:
Ըստ նրա, եթե ինքը լիներ վարչապետ Կարեն Կարապետյանի փոխարեն, ապա նման պայմաններում Ամանորը չէր նշի:
Ս. Հացպանյանի խոսքերով` Մոսկվայի կողմից Կ. Կարապետյանի նշանակումով հերթական անգամ ՀՀ Սահմանադրությունը ոտնակոխ արվեց:
«Իբրև վարչապետ` Կ. Կարապետյանն իր առաջին Նոր տարին անցկացնելու է բանտերում լիքը քաղբանտարկյալներով, ինչն ամոթ է առաջին հերթին իր համար»,- ասաց նա` կոչ անելով վարչապետին բռնել մինչ օրս Հայաստանը թալանած գողերի ձեռքը:
Հաջորդ կարևոր իրադարձությունը, որն առանձնացրեց Ս. Հացպանյանը, դա Իրանի Իսլամական Հանրապետության նախագահ Հասան Ռոհանիի այցն էր Հայաստան:
Փորձագետի կարծիքով` Հայաստանում Հ. Ռոհանիի կողմից արված հայտարարությունները և ստորագրված մի շարք համաձայնագրերն ուղղակի մեսիջ էին ուղղված Բաքվին այն մասին, որ Հայաստանն ի դեմս Իրանի` ունի հավատարիմ հարևան և գործընկեր:
Անդրադառնալով ավելի գլոբալ իրադարձություններին` Ս. Հացպանյանը աննախադեպ որակեց ԱՄՆ նախագահ Դոնալդ Թրամփի հաղթանակը, որի պարագայում ըստ նրա` ԱՄՆ-ն այլևս հանդես չի գա աշխարհակալ դիրքերից:
Վերլուծաբանի գնահատմամբ` հայ-ռուսական հարաբերություններում կա էական տեղաշարժ` ի վնաս Հայաստանի: Նրա պնդմամբ` Հայաստանը կորցրեց իր օդային սահմանները, հետևաբար այսուհետ ռուսաստանյան ռազմական մեքենան կվարվի այնպես, ինչպես որ ցանկանա:
Իսկ ռուս-թուրքական հարաբերությունները Ս. Հացպանյանի համոզմամբ` միշտ էլ ջերմ են լինելու` անկախ նրանից, թե Թուրքիայի տարածքում ռուսական ինքնաթիռ կխոցվի կամ ռուս դեսպան կսպանվի:
Որպես 2016 թվականի ամենակարևոր իրադարձություն` բանախոսն առանձնացրեց ապրիլյան քառօրյա պատերազմը, որը ցույց տվեց, որ հայ ժողովուրդը կանգուն է, իսկ այսօր Հայաստանի սահմանները պաշտպանող զինվորները ոչնչով չեն զիջում Արցախյան ազատամարտը կերտած հայորդիներին:
Ս. Հացպանյանի գնահատմամբ` 2017 թվականն ավելի բարդ տարի է լինելու, քանի որ առջևում խորհրդարանական ընտրություններ են, որոնք վճռորոշ դեր կարող են ունենալ հայ ժողովրդի հետագա ճակատագրի հարցում:
ՀԱՅԵՐԵՆ
Русский
English
Դաս. հայերեն
French
