Գյուղապետը գյուղի գլխավոր փողոցն ու երաժշտական դպրոցն անվանակոչել է իր անունով. Newsbook.am
09-01-2017 17:49:06 | Հայաստան | Հասարակություն
NewsBook-ի զրուցակիցն է Նոր Գեղի գյուղապետ Ֆրոնտիկ Թևոսյանը:
- Պարոն Թևոսյան, ինչո՞ւ որոշեցիք Նոր Գեղի գյուղի գլխավոր փողոցը և երաժշտական դպրոցն անվանակոչել Ձեր անունով:
- 70-ամյակիս կապակցությամբ փողոցը, իսկ 65-ամյակիս երաժշտական դպրոցը անվանակոչել ենք իմ անունով:
- Օրինակ՝ Ձեր 80-ամյակի կապակցությամբ ի՞նչն եք Ձեր անունով կոչելու:
- Դե, եթե կենդանի մնացի, գյուղը կանվանեմ իմ անունով:
- Ո՞ւմ առաջարկությունն է եղել փողոցն ու դպրոցը Ձեր անունով անվանակոչելը:
- Գյուղացիներից ինչ-որ մեկի առաջարկով ավագանին քննարկել և անվանակոչել է:
- Որոշումը միաձա՞յն ընդունվեց:
- Որոշումն ընդունվել է միաձայն: 11 հատ ավագանի կա, միաձայն ընդունվել է: 30 տարի աշխատել եմ, դա քիչ չի չէ՞: Չգիտեմ՝ գիտեք, թե՝ չէ, ես օլիգարխ չեմ, այս պահին մի 600 հազար դոլարի վարկեր ունեմ:
- Գյուղում կյանքն այդքան վա՞տ է, որ վարկերով եք ստիպված ապրել:
- Դե, չէ, մենք այգիներ ենք հիմնել: Ճիշտն ասած՝ դա տղայիս անունով: Մենք դրսից տնկիներ ենք ներկրում: 500 հեկտար այգիներ կան:
- Փաստորեն, նաև ընտանեկան բիզնես ունեք:
- Այո, ընտանեկան բիզնես ունենք:
- Պարոն Թևոսյան, վարչապետը խաղի նոր կանոն է սահմանում գյուղապետների համար: Դուք տեղյա՞կ եք:
- Տեղյակ ենք: Մի հատ քայլ է գնում ամբողջ հանրապետությունով, որը որ խուճապ է ստեղծել: Ինձ համար էլ որպես քաղաքացի դա լավ չէ:
- Ինչի՞ մասին է խոսքը:
- Խոշորացում է գնում ամբողջ հանրապետությունում: Նախատեսվում է մայիսին Թեղենիքը, Արգելը և մեր գյուղը միավորել Նոր Հաճնի հետ:
- Ինչո՞ւ չեք բողոքում, հնարավոր է՝ վարչապետը լսի Ձեզ:
- Ճիշտն ասած՝ ժողովուրդն ասում է՝ բողոքենք, ասում եմ՝ այ մարդ, գործ չունեք, բողոքեք՝ կասեն՝ Թևոսյանն է կազմակերպել:
- Դուք ևս դեմ եք խոշորացմանը, ինչո՞ւ չեք բողոքում:
- Դե, ճիշտն ասած, ես սպասում եմ կողքի գյուղերը բողոքեն: Մենք ավելի մոտ ենք Նոր Հաճնին, քան մյուս գյուղերը: Մեզ համար ավելի հեշտ կլինի:
- Ամեն դեպքում Դուք կզրկվեք Ձեր պաշտոնից:
- Դե, ոչինչ, ես էս անգամ չէի էլ ուզում առաջադրվել, ինչ-ինչ պատճառներով առաջադրվեցի: Համ էլ տարիքս արդեն էն չի, 72 տարեկան եմ: Կանցնեմ թոշակի կամ բիզնեսով կզբաղվեմ: Այգեգործությամբ կզբաղվեմ, այգիներ կջրեմ, այգիներ կվարեմ:
ՀԱՅԵՐԵՆ
Русский
English
Դաս. հայերեն
French
