Դատական սանկցիա կիրառել Վահան Շիրխանյանի հանդեպ.Դատական նիստը հետաձգվել է
27-01-2017 16:17:09 | Հայաստան | Ի՞նչ է գրում մամուլը
Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում դատավոր Արմեն Բեկթաշյանի գլխավորությամբ սկսվեց 2015 թ-ին ԱԱԾ- վնասազերծած հանցավոր խմբի դատական նիստը: Ինչպես նախորդ նիստին, այս անգամ էլ ամբասատնյալներից պաշտպանության նախկին փոխնախարար Վահան Շիրխանյանը դատական նիստին ներկա չէ:
Նախորդ դատական նիստում Հայկ Ալումյանը հայտարարել էր, որ Վահան Շիրխանյանը ոչ թե չի ցանկանում, այլ չի կարող ներկայանալ դատարան առողջական վատ վիճակի պատճառով: Ավելին` Հայկ Ալումյանը հայտարարել էր, որ Շիրխանյանի առողջական վիճակի մասին կեղծ թղթեր են ներկայացվել: Այսօր դատավորը, հիմք ընդունելով ՀՀ ԱՆ «Երեւան-կենտրոն» քրեակատարողական հիմնարկը, որտեղ գտնվում է Վահան Շիրխանյանը, գրավոր փաստաթուղթը, հայտարարեց. « ՔԿՀ-ը կեղծ փաստաթղթեր չի տրամադրել: Վահան Շիրխանյանը ստացիոնար բուժման կարիք չունի: Նա հրաժարվում է դեղերն ընդունել»:
Մեղադրող կողմն էլ միջնորդություն ներկայացրեց դատարանին` դատական սանկցիա կիրառել Վահան Շիրխանյանի հանդեպ, քանի որ նա չարամտորեն չի ներկայանում դատարան, անհարգալից վերաբերմունք է դրսեւորում դատարանի հանդեպ:
Վահան Շիրխանյանի պաշտպան Հայկ Ալումյանն էլ հակադարձեց. «Դատարանի հանդեպ անհարգալից վերաբերմունք է դրսեւորում ՀՀ ԱՆ «Երեւան-կենտրոն» քրեակատարողական հիմնարկը, որը վերախմբագրել է դատարանի պահանջը: Փոխանակ Ձեզ տրամադրեն անկետաների պատճենները, տրամադրում են անկետաների քաղվածքները: Պահանջում եմ, որ դատարանը ՔԿՀ-ից պահանջի Վահան Շիրխանյանի բժշկական բոլոր փաստաթղթերը »:
Դատական նիստը հետաձգվեց: Հաջորդ դատական նիստը նշանակված է փետրվարի 17-ին 14:30-ին: