Շատ հաճախ վնասվածքից առաջացած ցավի դիմակի տակ թաքնված է ոսկրային ուռուցքը. ուռուցքաբան-օրթոպեդ (տեսանյութ)
03-02-2017 17:04:46 | Հայաստան | Հասարակություն
Շատ հաճախ վնասվածքից առաջացած ցավի դիմակի տակ թաքնված է ոսկրային ուռուցքը: Այս մասին փետրվարի 3-ին լրագրողների հետ հանդիպման ժամանակ նշեց ուռուցքաբան-օրթոպեդ, բ.գ.թ. «Նաիրի» բժշկական կենտրոնի օնկոօրթոպեդիայի և ոսկրային պաթոլոգիայի ծառայության ղեկավար Գալուստ Գալուստյանը:
Ըստ նրա` դա է պատճառը, որ ընդհանուր վնասվածքաբաները պետք է շատ զգոն լինեն հիվանդի գանգատների նկատմամբ, որոնք կարող են առաջանալ ինչպես վնասվածքի պահին, այնպես էլ դրանից հետո, որպեսզի նրանց ուղղորդեն համապատասխան մասնագետների մոտ ավելի խորացված հետազոտություն անցնելու համար:
Գ. Գալուստյանի բնորոշմամբ` ոսկրային ուռուցքները հիվանդությունների մի մեծ խումբ է, որով հիմնականում ախտահարվում են երեխաներն ու դեռահասները, ինչը լուրջ սթրեսային և հոգեբանական խնդիրներ է առաջացնում թե երեխաների, թե նրանց հարազատների մոտ:
«Հոգեբանական լարվածություն ունենում են նաև բժիշկները, քանի որ որոշվում է ոչ միայն հիվանդի վերջույթների, այլև կյանքի հարցը. այստեղ շատ մեծ է քիմոթերապևտների դերը, որոնք անցկացնելով նախավիրահատական բուժումը, կարողանում են պայմաններ ստեղծել վիրաբույժների համար, որպեսզի պահպանվեն վերջույթները»,- ասաց նա` ընդգծելով, որ մեծամասամբ ախտահարվում են երկար խողովակավոր ոսկրերը:
Մասնագետի պնդմամբ, եթե նախկինում օնկոօրթոպեդիա մասնագիտությունն այնքան էլ զարգացած չէր և սովորաբար ոսկրային ուռուցքներ ունեցող հիվանդներին կատարում էին հաշմող վիրահատություններ` չփրկելով հիվանդի կյանքը, ապա վերջին տասնամյակում արդեն հնարավորություն է ստեղծվել ազդել այսպես կոչված միկրոմետաստազների վրա, որոնցով որ պայմանավորված է հիվանդության վատ արդյունքը:
Գ. Գալուստյանի խոսքերով` ներկայումս հնարավոր է վերացնել ինչպես այդ հիվանդության ընդահնուր տարածումը, այնպես էլ նախապայմաններ ստեղծել վիրահատական բուժման համար, որի ընթացքում մասնագետները կարողանում են հեռացնել ախտահարված ոսկրի տվյալ հատվածը` այն վերականգնելով անհատական էնդոպրոթեզների միջոցով:
Ուռուցքաբան-օրթոպեդը նկատեց, որ ոսկրային քաղցկեղով ախտահարված հատվածի ոչ սպեցիֆիկ նշաներից են այտուցվածությունը և ցավը, ինչն էլ հաճախ հիվանդները վերագրում են այլ հիվանդություններին:
ՀԱՅԵՐԵՆ
Русский
English
Դաս. հայերեն
French
