«Երիտասարդ բնապահպան» անվանակարգում հաղթող է ճանաչվել «Երիտասարդ կենսաբանների ասոցիացիա» հասարակական կազմակերպությունը

16-02-2017 16:49:09   | Հայաստան  |  Մամլո հաղորդագրություն
ՀՀ բնապահպանության նախարարի տեղակալ Խաչիկ Հակոբյանը մասնակցել է ՀՀ սպորտի և երիտասարդության հարցերի նախարարության կազմակերպած 2016 թվականի երիտասարդական մրցանակաբաշխության եզրափակիչ փուլին և մրցանակակիրների պարգևատրման հանդիսավոր արարողությանը: 
 

Մրցանակաբաշխության նպատակն է խրախուսել տարվա ընթացքում նշանակալի հաջողությունների հասած երիտասարդներին, երիտասարդական խմբերին և երիտասարդական հասարակական կազմակերպություններին, արժևորել նրանց ձեռքբերումները:
Տեղում կազմակերպված բաց քվեարկության արդյունքում «Երիտասարդ բնապահպան» անվանակարգում հաղթող է ճանաչվել «Երիտասարդ կենսաբանների ասոցիացիա» հասարակական կազմակերպությունը`  իրականացրած բազմաթիվ բնապահպանական ծրագրերի, մասնավորապես  Հայաստանում առաջին էկոտուրիզմի փառատոնի կազմակերպման համար:
Հանձնելով մրցանակը հաղթող հասարակական կազմակերպությանը` Խաչիկ Հակոբյանը ողջունել է միջոցառման կազմկերպումը և կարևորել հասարակական կազմակերպությունների դերը բնապահպանական խնդիրների լուծման և, ընդհանրապես, պետականաշինության գործընթացում: Փոխնախարարը նաև բարձր է գնահատել ՀՀ բնապահպանության նախարարության և հասարակական կազմակերպությունների` մասնավորապես  «Երիտասարդ կենսաբանների ասոցիացիա» ՀԿ-ի հետ համագործակցությունը:
 
Նոյյան տապան   -   Մամլո հաղորդագրություն
Լուրեր Հայաստանից եւ Սփյուռքից