Եթե չլիներ Եվրոպական դատարանը, ապա Հայաստանում ուժեղները կարող էին թույլերին ուտել բառիս իսկական իմաստով. Վահան Շիրխանյանի փաստաբան (տեսանյութ)
11-03-2017 15:09:06 | Հայաստան | Իրավունք
«Փառք Աստծո, որ մենք ունենք Եվրոպական դատարան. եթե այն չլիներ, մեզ մոտ ուժեղները կարող էին թույլերին ուտել բառիս իսկական իմաստով»,- նման գնահատական հայաստանյան արդարադատական համակարգին տվեց ՀՀ նախկին փոխվարչապետ, ՀՀ պաշտպանության նախկին փոխնախարար Վանահ Շիրխանյանի փաստաբան Հայկ Ալումյանը:
Վերջինս ներկայացնելով Վ. Շիրխանյանի ներկայիս առողջական վիճակը, նշեց, որ այսօր է տեսակցել նրան, սակայն որևէ դրական տեղաշարժ չի նկատվել, ավելին՝ իրավիճակը գնալով ավելի է վատանում:
Նրա փոխանցմամբ՝ մինչև փետրվարի 22-ը Եվրոպական դատարանը ժամանակ էր տվել Հայաստանի կառավարությանը Վ. Շիրխանյանի առողջական վիճակի հետ կապված 5 հարցի «Կառավարությունը հավանաբար հասկանալով, որ առանց Շիրխանյանին հիվանդանոց տեղափոխելու չի կարող արդարացնել նրա նկատմամբ իրականացվող իր քայլերը, ամսի 22-ին պատասխանում է, որ Վ. Շիրխանյանին վաղը տեղափոխելու են հիվանդանոց հետազոտության և ստացիոնար բուժման համար»,- ասաց նա՝ հավելելով, որ Շիրխանյանին փետրվարի 23-ին իրոք տեղափոխում են հիվանադանոց, սակայն ութ օր անց կրկին վերադարձնում են ՙԵրևան-Կենտրոն՚ քրեակատարողական հիմնարկի խուց:
Հ. Ալումյանի խոսքերով՝ Վ. Շիրխանյանին հիվանադանոց տեղափոխելով՝ պատկան մարմինները պարզապես փորձել են եվրոպական դատարանին ցույց տալ, որ իրենք ինչ-որ քայլեր ձեռնարկում են, մինչդեռ այդ ամենը ձևական բնույթ է կրում, քանի որ հետազոտություններից հետո Վ. Շիրխանյանին չեն պահել բուժման համար. ավելին՝ նրան տարել են քրեակատարողական հիմնարկի ամենախոնավ, ամենանեղ ու վատ խուցը, որտեղ ևս երեք դատապարտյալ է եղել:
Վ. Շիրխանյանի փաստաբանը նկատում է, որ բանտախցի պայմաններից դժգոհելով՝ Վ. Շիրխանյանի բողոքը բանտապահները փոխանցում են բանտապետին, ով իրավիճակը շտկելու փոխարեն, նրանց մոտ է տեղափոխում 5-րդ մարդուն:
Հ. Ալումյանը գտնում է, որ այդ ամենը վրեժխնդրության դրսևորում է այն բանի համար, որ այս գործը հասել է նաև Եվրոդատարան:
Անդրադառնալով Վ. Շիրխանյանի բժշկական փաստաթղթերի հետ կապված քաշքշուկներին՝ բանախոսն ընդգծեց, որ իրենց չեն տրամադրվել դրանք անգամ դատարանի միջնորդությամբ:
«Ես շատ ցավում եմ, որ իրենք երկու քայլ այն կողմ չեն տեսնում, բայց պետք է հասկանային, որ Վ. Շիրխանյանի բժշկական քարտը Եվրոպական դատարանն է պահանջելու, ինչը եղավ, սակայն այս դեպքում էլ պատկան մարմիններն իրենց սև գործն արեցին՝ Եվրոպական դատարան ուղարկելով 179 թերթից բաղկացած բժշկական քարտի ընդամենը 49 թերթը»,- նշեց Հ. Ալումյանը՝ հավելելով, որ իրենք Վ. Շիրխանյանի բժշկական փաստաթղթերի ոչ ամբողջական լինելու մասին ևս տեղյակ են պահել Եվրոդատարանին:
Ըստ նրա՝ Եվրոպական դատարանում Վ. Շիրխանյանի գործով զբաղվող իրենց գործընկերները ջանք չեն խնայում Վ. Շիրխանյանին փրկելու համար:
Հ. Ալումյանը հույս հայտնեց, որ Եվրոդատարանը շուտով Վ. Շիրխանյանի գործով որոշում կկայացնի:
ՀԱՅԵՐԵՆ
Русский
English
Դաս. հայերեն
French
