Աղետների ռիսկի նվազեցման կետը ներառվելու է համայնքային բյուջեում. Դավիթ Տոնոյան

ՀՀ ԱԻ նախարար Դ. Տոնոյանն Արմավիրի մարզում էր

17-03-2017 16:03:51   | Արմավիրի մարզ  |  Մամլո հաղորդագրություն
ՀՀ արտակարգ իրավիճակների նախարար Դավիթ Տոնոյանն աշխատանքային այցով Արմավիրի մարզում էր: Նախարարն այցելեց մարզային փրկարարական վարչություն, Վաղարշապատ, Արմավիր քաղաքների և Բաղրամյան համայնքի հրշեջ-փրկարարական ջոկատներ,  ծանոթացավ փրկարարական կազմին և տեխնիկական հագեցվածությանը:  ՀՀ ԱԻՆ ՓԾ տնօրեն փ/ծ գնդապետ Մ. Ղազարյանի, ՀՀ ԱԻՆ աշխատակազմի ղեկավար Գ. Հայրապետյանի և Արմավիրի մարզային փրկարարական վարչության պետ, փ/ծ գնդապետ Հ. Մարգարյանի հետ քննարկվեցին մարզի հրշեջ-փրկարարական ջոկատների տեխնիկական հագեցվածության, համազգեստի որակի բարելավման և հրշեջ մեքենաների արդիականացման խնդիրները: Նախարարին ներկայացվեց հրշեջ-փրկարարական ջոկատների շենքային պայմանների բարեկարգման և արդիականացման նախագիծը:
 

ԱԻ նախարարը եղավ նաև Հայկական ատոմային էլեկտրակայանում (ՀԱԷԿ), հանդիպեց տնօրինության հետ: Հանդիպման ընթացքում նախարարին ներկայացվեցին ընթացիկ աշխատանքներն ու խնդիրները: Նախարար Տոնոյանն այցելեց նաև ՀԱԷԿ-ի հատուկ հրշեջ ջոկատը, զրուցեց անձնակազմի հետ, ծանոթացավ վերջիններիս շենքային պայմաններին, տեխնիկական զինվածությանն ու խնդիրներին: 
 
Այցի ընթացքում նախարարը հանդիպեց Արմավիրի մարզպետ Աշոտ Ղահրամանյանի և մի շարք համայնքների ղեկավարների հետ: Քննարկվեցին համայնքների և տեղի փրկարարական ջոկատների միջև համագործակցության խորացման ուղիները: Իր խոսքում ԱԻ նախարարն անդրադարձավ մարզերում աղետների ռիսկի կառավարման հիմնահարցին՝ նշելով, որ այս ոլորտում առկա խնդիրների լուծման սկիզբ կարող է դառնալ համայնքային բյուջեում աղետների ռիսկի նվազեցմանը միտված կետի ներառումը: 
 
Նոյյան տապան   -   Մամլո հաղորդագրություն
Լուրեր Հայաստանից եւ Սփյուռքից