Լուսանկարն արվել է երևանյան կրպակներից մեկում 

 

Ավելի վաղ «ՎիվաՍել-ՄՏՍ»-ը պարզաբանել էր, որ կանխավճարային բաժանորդների համար «Լիցք» ծառայության և լիցքավորման քարտերի միջոցով վերալիցքավորումն իրականացվում է մի քանի եղանակով։ Առաջին երկու դեպքում՝ ընկերության սպասարկման կենտրոններում, ներառյալ այնտեղ տեղադրված տերմինալների միջոցով և ընկերության կայքի միջոցով, միջնորդավճար չի գանձվում։

 

Իսկ լիցաքվորման երրորդ տարբերակն այն է, որի մասին հոդվածում խոսում ենք՝ այն իրականցվում է ընկերության ենթակայության տակ չգտնվող տնտեսվարող սուբյեկտների` Հայաստանով մեկ գործող ավելի քան 10 հազար մասնավոր վաճառակետերի միջոցով։ «ՎիվաՍել-ՄՏՍ»-ից նշել են, որ վերը նշված ծառայությունների մատուցման դեպքում նույնպես ընկերությունը միջնորդավճարի գանձում չի նախատեսում: Այսինքն՝  ընկերության պատասխանից ևս ենթադրվում է, որ հավելյալ գումար գանձելու պահանջը դրել են վերևում նշված կազմակերպությունները կամ անհատները՝ վերավաճառողները։

 

«Հետք»-ի հարցին, թե ընկերությունը քայլեր ձեռնարկու՞մ է նշված հավելյալ գումարների պահանջը վերացնելու ուղղությամբ, «ՎիվաՍել-ՄՏՍ»-ից պատասխանեցին. «ՎիվաՍել-ՄՏՍ-ի հետ համագործակցող բոլոր դիլերներին ուղարկվել է գրություն, որով վերջիններս նախազգուշացվել են, որ իրավունք չունեն փոփոխելու լիցքավորման քարտերի և հեռախոսահամարները գումարով համալրելու ծառայությունների սակագները»:   

 

Խնդրի վերաբերյալ հարցեր ենք ուղղել նաև բջջային մյուս երկու օպերատորներին՝ «Արմենտել»-ին և «Յուքոմ»-ին։ Նրանց պատասխանները կհրապարակենք ստանալուն պես։

 

Իսկ ՀՀ տնտեսական մրցակցության պաշտպանության պետական հանձնաժողովից մեզ հետ զրույցում ասացին, որ տեղյակ են խնդրին և առայժմ ուսումնասիրում են՝ որքանո՞վ է այն իրենց տիրույթում և կա՞ն, արդյոք, չարաշահումներ։ «Հանձնաժողովն այս պահին ուսումնասիրում է նշված խնդիրը՝ որքանո՞վ է խնդիրը հանձաժողովի դաշտում, կա՞ մրցակցային խնդիր և օրենքի չարաշահում, թե՞ ոչ։ Տեղեկություններ ենք պահանջել ինչպես «ՎիվաՍել-ՄՏՍ»-ից, «ԱրմենՏել»-ից ու «Յուքոմից», այնպես էլ՝ գերիշխող վերավաճառող ընկերություններից։ Տեղեկատվությունները ստանալու հետո արդեն արագ կավարտենք ուսումնասիրությունը»- ասաց հանձնաժողովի մամուլի խոսնակ Գայանե Սահակյանը։ Նրա խոսքով՝ քանի որ դեռևս հայտնի չէ, թե պահանջվող տեղեկությունները երբ իրենց ձեռքում կլինեն, հետևաբար՝ նաև հայտնի չէ, թե երբ հանձնաժողովը կավարտի ուսումնասիրությունը։