Ստարտափները արդեն կարող են դիմել Սևան Ստարտափ Սամմիթ 2017-ին
06-04-2017 13:25:35 | Հայաստան | Գիտություն եւ տեխնոլոգիաներ
«Ստարտափ Արմենիա» հիմնադրամը և «Գլոբալ ԷյԷմ» ՀԿ-ն ուրախ են տեղեկացնել, որ «Սևան Ստարտափ Սամմիթ 2017»-ի հայտագրման գործընթացն արդեն սկսվել է: Բոլոր հետաքրքրված ստարտափները Հայաստանից և արտերկրից կարող են ներկայացնել իրենց հայտերը ապրիլի 1-ից:
«Սևան Ստարտափ Սամմիթ 2017»-ը տեղի է ունենալու հուլիսի 24-ից 31-ը Սևանա լճի ափին: Սամմիթին դիմած ստարտափներից մասնակցության համար ընտրվելու են լավագույն 70-ը, որոնք էլ կտարբերակվեն 3 մակարդակներով (Seed stage, Early stage, Business stage): Բացի ընտրված 70 ստարտափներից սամմիթին մասնակցելու են նաև 30 ծրագրավորողների թիմեր: Միջոցառման շուրջ 1000 մասնաիցների թվում են ներդրողներ, մենթորներ, բիզնես թրեյներներ, աշխարհի տարբեր երկրներից հրավիրված հյուրեր, լրագրողներ:
Սամմիթի կազմակերպչական խմբի ղեկավար Վահագն Ռափյանը նշեց. «Հաշվի առնելով նախորդ տարվա մասնակիցների ակտիվությունը, արդյունքներն ու արձագանքը այս տարի ակնկալում ենք մեծ քանակությամբ դիմումներ: Մենք ներգրավել ենք մասնագետների լուրջ թիմ, որոնք աշխատելու են հայտագրված ստարտափ թիմերի հետ, գնահատելու են նրանց կենսունակությունը և ուղղորդելու են նրանց»:
«Սևան Ստարտափ Սամմիթը» նոր ձևաչափի ոչ ֆորմալ կրթական բիզնես հարթակ է, որը նպատակ ունի աջակցել ստարտափ թիմերին ներայացնել իրենց գաղափարները, ընդլայնել կապերի շրջանակը, ձեռք բերել նոր գիտելիքներ և ամենակարևորը գտնել ներդրողներ: Այս ամենը զուգորդվելու է ակտիվ ժամանցով և հաճելի միջավայրով:
ՀԱՅԵՐԵՆ
Русский
English
Դաս. հայերեն
French
