Տեղի կունենա Ազգային ժողովի հերթական լիագումար նիստը
19-04-2017 18:36:44 | Արցախ (ԼՂՀ) | Մամլո հաղորդագրություն
Արցախի Հանրապետության Ազգային ժողովի նախագահ Աշոտ Ղուլյանը ապրիլի 19-ին հրավիրել է աշխատանքային խորհրդակցություն՝ խորհրդարանի մշտական հանձնաժողովների և խմբակցությունների ղեկավարների և աշխատակազմի պատասխանատուների մասնակցությամբ:
Մինչ այդ, օրվա առաջին կեսին, Ազգային ժողովի ֆինանսաբյուջետային և տնտեսական կառավարման ու պաշտպանության, անվտանգության և օրինապահպանության հանձնաժողովներում տեղի ունեցած քննարկումների արդյունքում դրական եզրակացություն է տրվել «Լեռնային Ղարաբաղի Հանրապետության 2017 թվականի պետական բյուջեի մասին» ԼՂՀ օրենքում փոփոխություններ կատարելու մասին» օրենքի նախագծին և «Զինապարտության մասին» ԼՂՀ օրենքում փոփոխություններ և լրացումներ կատարելու մասին» օրենքի նախագծի 2-րդ ընթերցմանը:
Խորհրդակցության ընթացքում պատգամավորները մտքեր են փոխանակել նստաշրջանի օրակարգում ներառված հարցերի շուրջ և ստացել համապատասխան պարզաբանումներ:
Վեցերորդ գումարման Ազգային ժողովի 5-րդ նստաշրջանի օրակարգում ընդգրկված այլ հարցերից առաջիկա նիստին պատրաստ են նաև Արցախի Հանրապետության Մարդու իրավունքների պաշտպանի տարեկան զեկույցը ու «Սեյսմիկ պաշտպանության արևելյան ծառայություն» ՊՈԱԿ-ի 2016թ. գործունեության մասին հաղորդումը:
Ամփոփելով խորհրդակցության արդյունքները՝ խորհրդարանի նախագահը հայտարարել է, որ 6-րդ գումարման Ազգային ժողովի 5-րդ նստաշրջանի հերթական լիագումար նիստը տեղի կունենա ապրիլի 20-ին, ժամը՝ 11:00-ին: ԱԺ կանոնակարգ օրենքի համաձայն ժամը 13:00-ին նախատեսվում է նաև օրենսդիր-գործադիր հարցուպատասխանի ընթացակարգ:
ՀԱՅԵՐԵՆ
Русский
English
Դաս. հայերեն
French
